ಕಾಡಿನ ಹಾದಿ

ಅಡಿಕೆ ಮರದ ಪೀಠೋಪಕರಣ ಉದ್ಯಮ

2011-01-09T20:17:00.001+05:30

'ಅದು ಮೌಲ್ಯವರ್ಧನೆಯಲ್ಲ; ಮೌಲ್ಯಹಾನಿ' ಎದುರಿಗೆ ಕುಳಿತ ಎಪ್ಪತ್ತು ವರ್ಷದ ಹಿರಿಯ ಝಜೌ ಹೇಳಿದಾಗ ಪೆಚ್ಚಾಗಿ ಬಿಟ್ಟೆ. ಝುಜೌ ಚೀನಾದ ಗ್ರಾಮೀಣಾಭಿವೃದ್ಧಿಯ ಮಾದರಿ ರೂಪಿಸಿದ ಹಿರಿಯ. ಜಗತ್ತನ್ನೆಲ್ಲ ಸುತ್ತಾಡಿದ ಅನುಭವ. 'ಹೈನಾನ್ ಪ್ರಾಂತ ನೋಡಿದ್ದೇನೆ' ಎಂದು ನನ್ನೊಡನೆ ಹೇಳಿದ ಮೊದಲ ಚೀನೀಯ. ಚೀನೀ ಅಡಿಕೆಯ ಬಗ್ಗೆ ಮತ್ತಷ್ಟು ಮಾಹಿತಿ ಸಿಗಬಹುದೆಂದುಕೊಂಡು, ಅವರೊಡನೆ ಮಾತಿಗೆ ಕುಳಿತಿದ್ದೆ.

ಅಡಿಕೆಯ ಮೌಲ್ಯವರ್ಧನೆ ಎಂದ ತಕ್ಷಣ ನೆನಪಿಗೆ ಬರೋದು ಅಡಿಕೆ ಹಾಳೆಯ ದೊನ್ನೆ ಮತ್ತು ಪ್ಲೇಟ್ ತಾನೆ? ಅವರನ್ನು ಮಾತಿಗೆ ಎಳೆಯಲು ಹೆಮ್ಮೆಯಿಂದ ನಮ್ಮೂರಿನ ಈ ಉತ್ಪನ್ನಗಳ ಬಗ್ಗೆ ಹೇಳತೊಡಗಿದ್ದೆ. ಶುರು ಮಾಡಿ ಒಂದೇ ನಿಮಿಷದಲ್ಲಿ ಮುಖಕ್ಕೆ ಹೊಡೆದಂತೆ ಮೇಲಿನ ಮಾತು ಹೇಳಿ ನನ್ನ ಬಾಯಿ ಮುಚ್ಚಿಸಿದ್ದರು. ನಾನು ತಬ್ಬಿಬ್ಬಾಗಿ ಕುಳಿತಿದ್ದೆ.

'ನೈಸರ್ಗಿಕ ವಿನೀರ್ ಅದು. ಅದನ್ನೇಕೆ ಪ್ಲೈವುಡ್ ತಯಾರಿಯಲ್ಲಿ ಉಪಯೋಗಿಸ ಬಾರದು?' ಎಂದು ಕೇಳಿದರು. ಹೌದಲ್ಲವೇ? ಮೌಲ್ಯವರ್ಧನೆ ಎಂದರೆ ಒಂದು ವಸ್ತುವಿನ ಬೆಲೆಯನ್ನು ಎಷ್ಟು ಹೆಚ್ಚು ಮಾಡಲು ಸಾಧ್ಯ ಎಂದು ಪ್ರಯತ್ನಿಸುವುದು. ಕೇವಲ ರೂಪ ಬದಲಿಸುವುದಲ್ಲವಲ್ಲ!

ಪಿಡಿಎಫ್ ರೂಪದಲ್ಲಿ ಓದಲು ಅಡಿಕೆ ಪತ್ರಿಕೆಯ ಜಾಲತಾಣ http://www.adikepatrike.com/ ಗೆ ಬೇಟಿ ಕೊಡಿ.

ವೇನಿಸ್ ಎಂಬ ಮುಳುಗುತ್ತಿರುವ ನಗರ

2010-12-19T00:55:00.002+05:30

ಇತಿಹಾಸದ ವ್ಯಂಗ್ಯ ನೋಡಿ. ಒಮ್ಮೆ ಇಡೀ ಜಗತ್ತಿನ ವ್ಯಾಪಾರದ ಕೇಂದ್ರ ಬಿಂದುವಾದ ವೆನೀಸ್ ಇಂದು
ಕೇವಲ ಒಂದು "ಸತ್ತು ಹೋದ ನಗರ".
ಶತಮಾನದ ಹಿಂದೆ ಭಾರತ ಮತ್ತಿತರ ಏಷ್ಯಾದ ದೇಶಗಳಿಂದ
ಯುರೋಪಿಗೆ ಹೋಗುತ್ತಿದ್ದ ಸಂಬಾರ ಪದಾರ್ಥಗಳ ಪ್ರಮುಖ ವ್ಯಾಪಾರ ಕೇಂದ್ರವಾಗಿತ್ತು.
ಯುರೋಪಿನ ಇತಿಹಾಸದಲ್ಲಿ ವೆನೀಸಿಗೆ ಪ್ರಮುಖ ಸ್ಥಾನ. ಅದು ವ್ಯವಹಾರಗಳ ಕೇಂದ್ರವಾಗಿತ್ತು.

"ಮರ್ಚಂಟ್ಸ್ ಆಫ್ ವೆನಿಸ್" ಶೇಕ್ಸ್ ಪೀಯರನ ಪ್ರಮುಖ ನಾಟಕ.
ಇಲ್ಲಿನ ವ್ಯಾಪಾರ, ಅದರೊಂದಿಗೆ ಸೇರಿದ ಮೋಸ, ವರ್ಗ ಸಂಘರ್ಷ, ಹೀಗೆ ಏನೆಲ್ಲ ಆ ಕಾಲದ ಸೆಳಕುಗಳನ್ನು ತೆರೆದಿಡುತ್ತದೆ ಆ ನಾಟಕ.ಆ ನಾಟಕದ ನೆನಪಿನಲ್ಲಿ ಈ ಊರಿಗೆ ಹೋದರೆ ಅಲ್ಲಿ ಇರೋದು ಬರೀ ಪ್ರವಾಸೋದ್ಯಮ ಮಾತ್ರ. ನಗರ ಹಾಳು ಬಿದ್ದಿದೆ. ಸಮುದ್ರದ
ನಡುವಿನ ಮರಳ ರಾಶಿಯಲ್ಲಿ ನಿಂತಿದ್ದ ನಗರ ನೀರಿನಲ್ಲಿ ಕುಸಿಯುತ್ತಿದೆ; ಇತಿಹಾಸದ ಹಾಗೆ!.

"ಅದು ಈಗ ಬದುಕಿರುವುದು ಕೇವಲ ಪ್ರವಾಸೋದ್ಯಮದ ಮೇಲೆ. ಹಾಗಾಗಿ ಕ್ರತಕವಾಗಿ ಆ ನಗರವನ್ನು
ಬದುಕಿದಂತೆ ತೋರಿಸಲಾಗುತ್ತಿದೆ" ಎನ್ನುತ್ತಾರೆ ಇಟಲಿಯ ಅಂತಾನಿಯೋ.
ಇಟಲಿಯ ದಕ್ಷಿಣ ತುದಿಯ ನಗರದ ಒಂದಿಷ್ಟು ನೋಟ, ನಿಮಗಾಗಿ.

ಔಷಧದಲ್ಲಿ ಅಡಿಕೆ

2010-12-05T22:33:00.010+05:30

ಚೀನಾದಲ್ಲಿ ಅಡಿಕೆ ಔಷಧಗಳ ಬಗ್ಗೆ ಅಡಿಕೆ ಪತ್ರಿಕೆಯಲ್ಲಿ ಬರೆದ ಎರಡನೇ ಲೇಖನ ಇಲ್ಲಿದೆ. ನೋಡಿ ನಿಮ್ಮ ಅಭಿಪ್ರಾಯ ತಿಳಿಸಿ. .pdf ರೂಪದಲ್ಲಿ ಅಡಿಕೆ ಪತ್ರಿಕೆಯ ಜಾಲತಾಣದಿಂದಲೂ ಓದಬಹುದು.
http://www.adikepatrike.com/

"ಬಿಂಗಲಾಂಗ" ಬೆನ್ನುಹತ್ತಿ! -ಚೀನಾದಲ್ಲಿ ಅಡಿಕೆಯ ಹುಡುಕಾಟ

2010-11-13T20:21:00.016+05:30

ಚೀನಾ ಪ್ರವಾಸದ ಸಮಯದಲ್ಲಿ ನಮ್ಮ ರೈತ ಸಮುದಾಯಕ್ಕೆ ಬೇಕಾದ ಅನುಭವಗಳನ್ನು "ಅಡಿಕೆಪತ್ರಿಕೆ"ಯಲ್ಲಿ "ಡ್ರಾಗನಿನ ನಾಡಿನಲ್ಲಿ" ಎನ್ನುವ ಹೆಸರಿನ ಲೇಖನ ಮಾಲೆಯನ್ನು ಬರೆಯಲು ಅವಕಾಶಮಾಡಿಕೊಟ್ಟಿದ್ದಾರೆ. ಅದರ ಮೊದಲ ಕಂತು ಇಲ್ಲಿದೆ. ಅವಕಾಶ ಮಾಡಿಕೊಟ್ಟು ಬರೆಯಲುಹುರಿದುಂಬಿಸುತ್ತರಿವ "ಶ್ರೀ" ಪಡ್ರೆ ಯವರಿಗೆ ಮತ್ತು ಅಡಿಕೆ ಪತ್ರಿಕೆ ಬಳಗಕ್ಕೆ, ಅಡಿಕೆಯಹುಡುಕಾಟಕ್ಕೆ ಸಹಾಯ ಮಾಡಿ, ಪ್ರೋತ್ಸಾಹಿಸಿದ ಕ್ಯಾಂಪ್ಕೋ ಸಂಸ್ಥೆಗೆ ಧನ್ಯವಾದಗಳು.

ನೇರವಾಗಿ ಅಡಿಕೆ ಪತ್ರಿಕೆಯ ಜಾಲತಾಣದಿಂದ (http://www.adikepatrike.com/) pdf ನಂತೆ ಡೌನಲೋಡ್ಮಾಡಿಯೂ ಓದಬಹುದು.

ಚೀನಾದಲ್ಲಿ ಅಡಿಕೆ - ಲೋಕಧ್ವನಿ ವರದಿ

2010-11-13T19:25:00.008+05:30

ಚೀನಾದಲ್ಲಿ ಅಡಿಕೆಯ ಮೌಲ್ಯವರ‍್ಧನೆಯ ಬಗ್ಗೆ ಸಿರಸಿಯ ಟಿ.ಎಸ್.ಎಸ್ ಸಂಸ್ಥೆಯಲ್ಲಿ ಮಾತನಾಡಲು ಅವಕಾಶವಾಗಿತ್ತು. ಅದರ ವರದಿ ಲೋಕಧ್ವನಿಯಲ್ಲಿ ಪ್ರಕಟವಾಗಿದ್ದು ಹೀಗೆ.
ಲೋಕಧ್ವನಿ ಬಳಗಕ್ಕೆ, ಕಾರ‍್ಯಕ್ರಮಕ್ಕೆ ಕಾರಣರಾದ ಮಿತ್ರ ಶಿವಾನಂದ ಕಳವೆಯವರಿಗೆ,ಟಿಎಸ್ ಎಸ್ ಅಧ್ಯಕ್ಕರಾದ ಶಾಂತಾರಾಮ ಹೆಗಡೆಯವರಿಗೆ, ಮತ್ತಿತರಿಗೆ ಧನ್ಯವಾದಗಳು.

ಸಂರಕ್ಷಣೆಯ ಹಾದಿ

2010-10-30T22:01:00.015+05:30

ನನಗಿನ್ನೂ ನೆನಪಿದೆ; ನಮ್ಮ ಮನೆ ಅಂಗಳದಲ್ಲಿ ಪ್ರತಿದಿನ ಬಂದು ನಿಲ್ಲುತ್ತಿದ್ದ ಆ ಜೀಪು. ನಾನಾಗ ತುಂಬಾ ಸಣ್ಣವನಿದ್ದೆ. ಶಾಲೆಗೆ ಸಹ ಹೋಗುತ್ತಿರಲಿಲ್ಲ. ಆ ಜೀಪಿಗಾಗಿ ನಾನು ಕಾತರದಿಂದ ಕಾಯುತ್ತಿದ್ದೆ. ಕಾರಣ ಮತ್ತೇನಲ್ಲ; ಆ ಜೀಪಿನ ಡ್ರೈವರ್ ನನಗೆ ಚಾಕೊಲೇಟ ತರುತ್ತಿದ್ದ. ಒಂದು ದಿನ ಆ ಜೀಪನ್ನು ದಾರಿಯಲ್ಲಿ ಅಡ್ಡಗಟ್ಟಿ ಜನರೆಲ್ಲ ಪ್ರತಿಭಟಿಸುತ್ತಾರೆ ಎಂದಾಗ ನನಗೆ ಪಿಚ್ಚೆನಿಸಿತ್ತು.

ಜೀಪು ಅಘನಾಶಿನಿ ಕಣಿವೆಯಲ್ಲಿ ಜಲ ವಿದ್ಯುತ ಯೋಜನೆಗೆ ಸರ್ವೆ ಮಾಡಲು ಬರುವ ಅಧಿಕಾರಿಗಳದ್ದಾಗಿತ್ತು. ನಮ್ಮ ಮನೆ ಹತ್ತಿರವೇ ಅಘನಾಶಿನಿ ಯೋಜನೆಯ ವಿದ್ಯುತ ಘಟಕ ಯೋಜಿತವಾಗಿದ್ದರಿಂದ ತುಂಬಾ ದಿನಗಳವೆರೆಗೆ ಸರ್ವೆ ಕಾರ್ಯ ನಡೆಯುತ್ತಿತ್ತು.

ಉತ್ತರ ಕನ್ನಡ ಜಿಲ್ಲೆಯಲ್ಲಿ ಈಗಾಗಲೇ ಇರುವ ಮತ್ತು ಪ್ರಸ್ತಾಪಿಸಲಾದ ಯೋಜನೆಗಳು

ಬೇಡ್ತಿ ಅಘನಾಶಿನಿ ಯೋಜನೆಗಳು ಕಳೆದ ನಾಲ್ಕು ದಶಕಗಳಿಂದ ಉತ್ತರ ಕನ್ನಡದ ಜನರನ್ನು ಕಾಡುತ್ತಿರುವ ಸಮಸ್ಯೆ. ತೀರ ಇತ್ತೀಚೆಗೆ ಸಹ ಮತ್ತೆ ಪ್ರಸ್ತಾಪವಾಗಿತ್ತು. ಈ ಪ್ರದೇಶದ ಸರಿ ಸುಮಾರು ಎರಡು ತಲೆಮಾರು ಈ ಯೋಜನೆಗಳ ಭಯದಲ್ಲೇ ಬದುಕಿವೆ. ಎಷ್ಟೊತ್ತಿಗೆ ಊರು ಬಿಟ್ಟು ಹೊರಡಬೇಕಾದ ಪರಿಸ್ಥಿತಿ ಬರಬಹುದೆಂದೆನ್ನುವ ಆತಂಕದಲ್ಲಿ ಕಳೆದಿದ್ದಾರೆ.

ಈಗ ಕಳೆದ ಅಗಷ್ಟ ತಿಂಗಳಲ್ಲಿ ನಡೆದ ರಾಜ್ಯ ವನ್ಯಜೀವಿ ಮಂಡಳಿಯ ಸಭೆಯಲ್ಲಿ ಈ ಭಾಗದ ಜನ ನೆಮ್ಮದಿಯ ನಿಟ್ಟಿಸಿರು ಬಿಡುವ ಸುದ್ದಿ ಹೊರ ಬಿದ್ದಿದೆ. ಎಲ್ಲ ಸುಗಮವಾಗಿ ನಡೆದರೆ, ಇನ್ನು ಅಂಥ ಭಾರೀ ಯೋಜೆಗಳು ಪ್ರಸ್ತಾಪವಾಗಲಾರವು ಎನ್ನುವ ಭರವಸೆ ಮೋಡಿದೆ. ಈ ಪ್ರದೇಶವನ್ನು "ಸಂರಕ್ಷಣಾ ವಲಯ " ಎಂದು ಘೋಷಿಸಲು ನಿರ್ಧರಿಸಿದೆ.

ಉತ್ತರ ಕನ್ನಡ ಜಿಲ್ಲೆಯ ಪರಿಸರ ಸೂಕ್ಷ್ಮ ಪ್ರದೇಶಗಳು

2007ರಲ್ಲಿ ಸ್ವರ‍್ಣವಲ್ಲಿಯಲ್ಲಿ ಸಭೆಯೊಂದು ಏರ್ಪಾಡಾಗಿತ್ತು. ಇಡೀ ಉತ್ತರ ಕನ್ನಡವನ್ನು "ಸೂಕ್ಷ್ಮ ಪ್ರದೇಶ" ಎಂದು ಘೋಷಿಸುವ ಬಗ್ಗೆ. ಹಿರಿಯ ಲೇಖಕರಾದ ಶ್ರೀ ನಾಗೇಶ ಹೆಗಡೆಯವರೂ ಸೇರಿದಂತೆ ಹಲವು ವಿಜ್ಞಾನಿಗಳು, ಪರಿಸರಾಕ್ತರು ಆ ವಿಚಾರ ಸಂಕಿರಣದಲ್ಲಿ ಭಾಗವಹಿಸಿದ್ದರು. ನಮ್ಮ ಕ್ರಿಯಾಶೀಲ ಸಂಸದ ಅನಂತಕುಮಾರ ಹೆಗಡೆಯವರು ಜಿಲ್ಲೆಯನ್ನೇ "ಜೈವಿಕ ಸೂಕ್ಷ್ಮ ಪ್ರದೇಶ (Biosphere Reserve) ಎಂದು ಗುರುತಿಸುವ ಪ್ರಸ್ತಾವೆಯನ್ನು ಸಲ್ಲಿಸಲು ಅಸಕ್ತಿ ತಾಳಿದ್ದರು. ಅದೊಂದು ಒಳ್ಳೆಯ ನಡೆಯಾಗಿತ್ತು. ಆದರೆ ಉತ್ತರ ಕನ್ನಡದಂಥ ಇಡೀ ಜಿಲ್ಲೆಯನ್ನು ಹೀಗೆ ಘೋಷಿಸುವ ಸಾಧ್ಯತೆಗಳು ಕಡಿಮೆ ಇದ್ದವು. ಯುನೆಸ್ಕೋದ ಒಂದು ಯೋಜನೆ ಮಾತ್ರ ಆದ, ಭಾರತದ ಯಾವುದೇ ಕಾನೂನಿನಲ್ಲಿ ಮಾನ್ಯತೆ ಇಲ್ಲದ, ಇಂಥ ಯೋಜನೆ ಅಂತರಾಷ್ಟ್ರೀಯ ಮಟ್ಟದ ಹೆಸರಿಗೆ ಉಪಯುಕ್ತವಾದರೂ, ಇಂಥ ಭಾರೀ ಯೋಜನೆಗಳನ್ನು ನಿಲ್ಲಿಸುವಲ್ಲಿ ನ್ಯಾಯಾಲಯಗಳಲ್ಲಿ ಹೋರಾಡಲು ಶಕ್ಯವಾಗಿಲ್ಲವಾಗಿತ್ತು. ನಾನು ಜಿಲ್ಲೆಯ ಸಂರಕ್ಷಣಾ ಮಹತ್ವದ ೧೦ ಪ್ರಮುಖ ತಾಣಗಳನ್ನು ಆಯ್ಕೆ ಮಾಡಿ, ಈಗಿರುವ ಕಾನೂನುಗಳಡಿಯಲ್ಲಿ, ಸಣ್ಣ ಸಣ್ಣ ಪ್ರದೇಶಗಳನ್ನು ಸಂರಕ್ಷಿಸುವ ಕಾರ‍್ಯ ಹೆಚ್ಚು ಸುಲಭವಾಗಿ ಕಾರ‍್ಯ ಸಾಧ್ಯವೇನೋ ಎಂದಿದ್ದೆ. ಹಾಗೆ ಆಯ್ಕೆ ಮಾಡಿದ ಪ್ರದೇಶಗಳ ನಕ್ಷೆಯನ್ನು ನೋಡಿ.

ಹಾಗಾಗಿ ವನ್ಯ ಜೀವಿ ಸಂರಕ್ಷಣಾ ಕಾನೂನಿನಲ್ಲಿ ೨೦೦೬ರಲ್ಲಿ ೩೬ ಅ ದಂತೆ ಸೇರಿಸಿದ " ಸಂರಕ್ಷಣಾ ವಲಯ" ಎನ್ನುವ ಹೊಸ ವ್ಯವಸ್ಥೆ, ಕಾಡಿನ ಮಧ್ಯದಲ್ಲಿ ಮನುಷ್ಯರು ಬಾಳುತ್ತಿರುವ ನಮ್ಮಂಥ ಪ್ರದೇಶಗಳಿಗೆ ಸೂಕ್ತ. ಅಭಯಾರಣ್ಯ ಮತ್ತು ರಾಷ್ಟ್ರೀಯ ಉದ್ಯಾನವನದ ಹಾಗೆ ಮನುಷ್ಯರನ್ನು ಹೊರಗಿಟ್ಟು ಸಂರಕ್ಷಿಸುವುದಕ್ಕಿಂತ ಸ್ಥಳೀಯರೊಂದಿಗಿನ ಸಂರಕ್ಷಣಾ ವ್ಯವಸ್ಥೆ ಇದು.

ನಂತರ ಪಶ್ಚಿಮ ಘಟ್ಟ ಕಾರ್ಯಪಡೆಯ ಅಧ್ಯಕ್ಷರಾದ ಶ್ರೀ ಅನಂತ ಅಶೀಸರ ಅವರು ಇದನ್ನು ಪ್ರಮುಖ ಕಾರ‍್ಯಕ್ರಮವಾಗಿ ತೆಗೆದುಕೊಂಳ್ಳಲು ಆಸಕ್ತಿ ವಹಿಸಿದರು. ಅರಣ್ಯ ಭವದಲ್ಲಿ ಹಿರಿಯ ಅಧಿಕಾರಿಗಳ ಸಭೆಯಲ್ಲಿ ಈ ಬಗ್ಗೆ ನನಗೆ ಮಾತನಾಡಲು ಅವಕಾಶವನ್ನೂ ಒದಗಿಸಿದರು. ವಿಸ್ತ್ರತ ವರದಿ ತಯಾರಿಸುವ ಜವಾಬ್ದಾರಿಯೂ ನನಗೇ ಬಂತು. ಶಿರಸಿ ಉಪ ಅರಣ್ಯ ಸಂರಕ್ಷಣಾಧಿಕಾರಿಗಳಾದ ಶ್ರೀ ಮನೋಜಕುಮಾರ ಅವರೊಂದಿಗೆ ತಯಾರಿಸಿದ ವರದಿ ಈಗ ವನ್ಯ ಜೀವಿ ಮಂಡಳಿಯಲ್ಲಿ ಅನುಮೋದನೆ ಪಡೆದಿದೆ.

ದಾಂಡೇಲಿಯ ಹಾರ್ನಬಿಲ್ ಸಂರಕ್ಷಣಾ ವಲಯದ ಕಲ್ಪನೆ ಮನೋಜಕುಮಾರ ಅವರದ್ದೇ ಕಲ್ಪನೆ. ನಾನು ಕೇವಲ ನಕ್ಷೆ ತಯಾರಿಸಿ, ಒಂದಿಷ್ಟು ಸಲಹೆ ಕೊಟ್ಟಿದ್ದೆನಷ್ಟೆ. ನಂತರ ವಿಜಯ ಕರ್ನಾಟಕದ ಸಂಪಾದಕರೂ ಈ ಬಗ್ಗೆ ಬರೆದ ಮೇಲೆ ಮತ್ತಷ್ಟು ವೇಗ ಪಡೆಯಿತು.

ಜಿಲ್ಲೆಯ ಬಹುಪಾಲು ಪರಿಸರ ಸೂಕ್ಷ್ಮ ಪ್ರದೇಶಗಳನ್ನು, ಇನ್ನೂ ಅಳಿದುಳಿದಿರುವ ಒಳ್ಳೆ ಅರಣ್ಯವನ್ನ ಸೇರಿಸಿ, ಬೇಡ್ತಿ ಮತ್ತು ಅಘಾಶಿನಿ ಸಂರಕ್ಷಣಾ ವಲಯಗಳ ಯೋಜನೆಯನ್ನು ಸಿದ್ದಪಡಿಸಲಾಗಿದೆ.

ಬಹುಶಃ ಎಲ್ಲರಿಗೂ ನೆನಪಿರಬಹುದು.ಇತ್ತೀಚೆಗೆ ಹಣಕೋಣದಲ್ಲಿ ಉಷ್ಣಸ್ಥಾವರದ ಯೋಜನೆ ನಿಲ್ಲಲು ಪ್ರಮುಖ ಕಾರಣ, ಯೋಜನೆಯ ಪ್ರದೇಶ ಗೋವಾದ ಕೋಟಿಗಾಂವ ಅಭಯಾರಣ್ಯದಿಂದ ಹತ್ತು ಕಿ. ಮೀ. ಒಳಗೇ ಇದೆ ಎನ್ನುವುದು ಎಂದು. ಇಂತ ಸಂರಕ್ಷಣಾ ವಲಯದ ಸುತ್ತಲಿನ ಹತ್ತು ಕಿ. ಮೀ ಒಳಗೆ ಕೂಡ ಯಾವುದೇ ಭೃಹತ ಯೋಜನೆಗಳು ಬರುವ ಹಾಗಿಲ್ಲ. ಉತ್ತರ ಕನ್ನಡ ಜಿಲ್ಲೆಯ ಪರಿಸರ ಹೋರಾಟಕ್ಕೆ ಒಂದು ತಾತ್ವಿಕ ನೆಲೆ ಇದು. ಮೂವತ್ತು ವರ್ಷಗಳಿಂದ ಎಷ್ಟೊಂದು ಹಿರಿಯರು, ಈ ಹೋರಾಟದಲ್ಲಿ ಬಾಗವಹಿಸಿದ್ದರು. ನಮ್ಮೆಲ್ಲರಲ್ಲಿ ಪರಿಸರ ಕಾಳಜಿ ಹುಟ್ಟಲು ಅವರೆಲ್ಲರ ಕಾಳಜಿಯೇ ಕಾರಣ. ಆ ಎಲ್ಲ ಹಿರಿಯರಿಗೆ ಅಭಿನಂದನೆಗಳು.

***************************************************************

ಅಘನಾಶಿನಿ ಸಂರಕ್ಷಣಾ ವಲಯ:

ಅಘನಾಶಿನಿ ಕಣಿವೆಯ ಉಂಚಳ್ಳಿ ಜಲಪಾತದಿಂದ ಪ್ರಾರಂಭವಾದ ಅಘಾಶಿನಿ ಕಣಿವೆಯ ಎರಡೂ ಪಕ್ಕದ ಕಾಡು, ಗುಡ್ಡೆ ಕೋಟೆ, ನಿಲ್ಕುಂದ ದೇವಿಮನೆ, ವಾಟೆಹಳ್ಳ ಜಲಪಾತ, ಭೀಮನಗುಡ್ಡ, ನಿಶಾನೆ ಗುಡ್ಡ, ಬೆಣ್ಣೆಹೊಳೆ ಕಣಿವೆ, ಬೆಣ್ಣೆಹೊಳೆ ಜಲಪಾತ ಮೊರ್ಸೆ ಊರಿನ ಹಿಂಭಾಗ, ದೊಡ್ಮನೆ ಘಟ್ಟ, ಮೊದಲಾದ ಪ್ರದೇಶಗಳನ್ನು ಒಳಗೊಂಡಿದೆ. ಒಟ್ಟೂ ಪ್ರದೇಶ 96.344 ಚ.ಕಿ.ಮೀ.

ಬೇಡ್ತಿ ಸಂರಕ್ಷಣಾ ವಲಯ:

ಬೆಡ್ತಿ ನದಿ ಕಣಿವೆಯ ಮಾಗೋಡ ಜಲಪಾತದಿಂದ ಪ್ರಾರಂಭವಾಗಿ ಕಣಿವೆಯ ಎರಡೂ ಪಕ್ಕದ ಕಾಡು, ಜೇನು ಕಲ್ಲು ಗುಡ್ಡ ದಿಂದ ಕೆಳಾಸೆ ಗ್ರಾಮದವರೆಗೆ, ಶಹಿವಗಂಗಾ ಜಲಪಾತದಿಂದ, ಕೊಂಕಿ ಕೋಟೆ, ಬಿಳಿ ಹಳ್ಳ ಕಣಿವೆ ಮೊದಲಾದ ಪ್ರದೇಶಗಳನ್ನು ಒಳಗೊಂಡಿದೆ. ಒಟ್ಟೂ ಪ್ರದೇಶ 33.95 ಚ.ಕಿ.ಮೀ.

ಏನಿದು ಸಂರಕ್ಷಣಾ ವಲಯ?

ವನ್ಯ ಜೀವಿ ಸಂರಕ್ಷಣಾ ಕಾನೂನು, 1972, (2006ರ ಸೇರ್ಪಡೆ) 36 ಆ, ದಂತೆ ಘೋಶಿಸಲಾಗುವ, ಈ ಪ್ರದೇಶದ ಸಂರಕ್ಷಣೆಯನ್ನು ಅರಣ್ಯ ಇಲಾಖೆಯೋಮದಿಗೆ ಸ್ಥಳೀಯರನ್ನೂಳಗೊಂಡ ಸಮೀತಿಯು ನಿರ್ವಹಿಸುವುದು.

ಲಾಭಗಳು:

ಕೇವಲ 4 % ಅರಣ್ಯವನ್ನು ಸಂರಕ್ಷಣಾ ವಲಯ ಎಂದು ಘೋಶಿಸುವ ಮೂಲಕ ಜಿಲ್ಲೆಯ ಹೆಚ್ಚಿನ ಜೀವ ವೈವಿಧ್ಯತೆಯನ್ನು ಸಂರಕ್ಷಿಸಲು ಸಾಧ್ಯ.

ಅರಣ್ಯ ನಾಶವಾಗುವ ಬೃಹತ ಯೋಜನೆಗಳಿಗೆ ಕಡಿವಾಣ

ಜನಜೀವನಕ್ಕೆ ಯಾವುದೇ ಸಮಸ್ಯೆ ಇಲ್ಲ

ವನ್ಯ ಜೀವಿಗಳ ವಲಸೆ ಮಾರ್ಗ ಸುಸ್ಠಿರ

*********************************************************************

ಮತ್ತೆ ಬಂದಿದ್ದೇನೆ!

2010-10-17T14:13:00.003+05:30

ಮತ್ತೆ ಬಂದಿದ್ದೇನೆ, ಮೂರು ತಿಂಗಳ ನಂತರ . ಮೂರು ತಿಂಗಳು ಸುತ್ತಾಟದಲ್ಲೇ ಕಳೆದೆ.
ನಾಲ್ಕು ದೇಶಗಳನ್ನು ನೋಡಿದೆ.
ಇಟಲಿ ಮತ್ತು ಚೀನಾದಲ್ಲಿ ಒಂದೊಂದು ತಿಂಗಳು ಅಧ್ಯಯನದ ಅವಕಾಶ.
ಮಧ್ಯೆ ಒಂದು ತಿಂಗಳು ಊರಲ್ಲಿ.
ಇಟಲಿಯ ಆಲ್ಪ್ಸ ಪರ್ವತ, ಚೀನಾದ ಟಿಯಾನಮನ್ ಪರ್ವತ ಶ್ರೇಣಿಯಲ್ಲಿನ ಅಧ್ಯಯನ,
ಊರಲ್ಲಿ ಮೂರು ಹೊಸ ಸಂರಕ್ಷಣಾ ವಲಯದ ಘೋಷಣೆಗಾಗಿನ ಕೆಲಸ,
ಕೊನೆಗೆ ನಿನ್ನೆ ಬರುವಾಗ ವಿಮಾನ ತಡವಾಗಿ,
ದುಬೈಯಲ್ಲೇ ಒಂದು ದಿನದ ಸುತ್ತಾಟ, ......
ಹೀಗೆ ಏನೆಲ್ಲ ಘಟನೆಗಳು, ಎಷ್ಟೆಲ್ಲ ಹೊಸ ಬದಲಾವಣೆಗಳು?
ಕಳೆದ ಈ ಮೂರು ತಿಂಗಳಲ್ಲಿ 40 GB ಫೋಟೋಗಳು ಕಂಪ್ಯೂಟರನ್ನು ಹೊಕ್ಕು ಕುಳಿತಿವೆ.
ಎಲ್ಲಿಂದ ಶುರು ಮಾಡಲಿ, ನೆನಪಿನ ಸುರುಳಿಯ ಬಿಚ್ಚಲು ?

ವಸಂತ ಬರೆದ ಒಲವಿನ ಚಿತ್ತಾರ

2010-06-18T22:16:00.003+05:30

ಕಳೆದ ಬಾರಿ ಇನ್ನೊಂದಿಷ್ಟು ಚಿತ್ರಗಳನ್ನು ಹಾಕುತ್ತೇನೆ ಎಂದು ಹೇಳಿದ್ದೆ. ಈ ಮಧ್ಯೆ ಊರಿಗೆ
ಹೋಗಿ ಬರಬೇಕಾಯಿತು. ತಿರುಗಿ ಬಂದಾಗ ಇಲ್ಲಿನ ಚಿತ್ರವೇ ಬೆರೆಯಾಗಿತ್ತು. ಹೋಗುವಾಗ ಇದ್ದ ಹೂವುಗಳ
ಜಾಗದಲ್ಲಿ ಬೇರೆಯದೇ ಬಣ್ಣದ ಹೂವುಗಳು ತಲೆ ಎತ್ತಿದ್ದವು. ಕೆಲವನ್ನು ಇಲ್ಲಿ
ಹಾಕುತ್ತಿದ್ದೇನೆ. ನೋಡಿ.

ಛಳಿಗಾಲ್ಲಿ ಎಲೆ ಉದುರಿಸಿದ ಸಸ್ಯಗಳಿಗೆ ಈಗ ಸಂಭ್ರಮದ ಕಾಲ. ಬೆಳಿಗ್ಗೆ ಐದಕ್ಕೆಲ್ಲ ಕಾಣಿಸುವ ಸೂರ್ಯ ಸಂಜೆ ಮುಳುಗುವುದು ಹತ್ತು ಘಂಟೆಯ ನಂತರ. ಧಾರಾಳ ಬಿಸಿಲು. ದಿನಕ್ಕೆ ಒಂದೂವರೆ ದಿನದ ಬೆಳವಣಿಗೆ. ಮತ್ತೆ ಛಳಿಗಾಲ ಬರುವುದರೊಳಗೆ ಜೀವನ ಚಕ್ರ ಮುಗಿಸಬೇಲ್ಲ! ಬದುಕಿನ ಹೋರಾಟದಲ್ಲಿ ಬದಲಾವಣೆಗಳಿ ಅನಿವಾರ್ಯ!.

ಕಾಡ ನೋಡ ಹೋದೆ.......

2010-05-10T02:12:00.007+05:30

ಕಳೆದ ಒಂದು ತಿಂಗಳಂದ ಜರ್ಮನಿಯ ಕಾಡನ್ನು ಸುತ್ತಾಡುತ್ತಿದ್ದೇನೆ. ಉತ್ತರ ಭಾಗದ ಹಲವಾರು ನ್ಯಾಶನಲ್ ಪಾರ್ಕ್ ಮತ್ತು ನಿಸರ್ಗ ಸಂರಕ್ಸಿತ ಪ್ರದೇಶಗಳನ್ನು ಸುತ್ತಿದ್ದೇನೆ.

ಛಳಿಗಾಲದಲ್ಲಿ ಎಲೆ ಉದುರಿಸಿ, ಭರಡಾಗಿದ್ದ ಕಾಡಿಗೆ, ಛಳಿಗಾಲ ಮುಗಿಯುತ್ತದ್ದ ಹಾಗೆ ವಸಂತದ ಜೀವನೋತ್ಸಾಹ! ಎಲ್ಲೆಡೆ ಹಸಿರು.

ನೆಲವೆಲ್ಲ ಆವರಿಸಿದ್ದ ಹಿಮ ಕರಗಿದ ಮೇಲೆ ಎಲೆ ಉದುರಿದ ಕಾಡಿನಲ್ಲಿ, ಎಲ್ಲ ಭಣ ಭಣ.

ಅಪರೂಪಕ್ಕೆ ಕಂಡ ಸೂರ್ಯ ರಶ್ಮಿ ನೆಲದೊಳಗಿನ ಗಡ್ಡೆಗಳಿಗೆಲ್ಲ ಜೀವ ಬರುತ್ತದೆ.

ವರ್ಷವೆಲ್ಲ ಅಡಗಿ ಕುಳಿತ ಬೇಸರವ ಮರೆಯಲು, ಒಮ್ಮೆಲೆ ಚಿಗುರಿದ ಉತ್ಸಾಹ. ಕಾಡು ಮರಗಳು ಎಲೆ ಚಿಗಿರುವ ಮೊದಲೇ ತಮ್ಮ ಬದುಕನ್ನು ಕಂಡುಕೊಳ್ಳಬೇಕು. ಎಲೆ ಚಿಗಿರಿದ ಮೇಲೆ ಮತ್ತೆ ಕತ್ತಲು, ಸೂರ್ಯ ಕಾಣುವುದಿಲ್ಲ. ಬಾಳು ಬೆಳಗುವಿದಿಲ್ಲ. ಅದಕ್ಕೇ ಇರಬೇಕು , ಎಷ್ಟೊಂದು ಉತ್ಸಾಹ ನೋಡಿ! ಮೊನ್ನೆ ಮೊನ್ನೆಯ ವರೆಗೆ ಹಿಮ ತುಂಬಿದ್ದ ಕಾಡಿನಲ್ಲಿ, ಹಿಮ ಕರಗುತ್ತಿದ್ದ ಹಾಗೆ, ಇಂದು ಎಷ್ಟೊದು ಹೂವುಗಳು!

ಕಾಡು ಬದಲಾಗುವ ಪರಿ ಎಂಥ ಸೋಜಿಗ! ಅದೇ ಉತ್ಸಾಹದಲ್ಲಿ ಸುತ್ತುದ್ದೇನೆ. ನಿತ್ಯ ಹರಿದ್ವರ್ಣ ಕಾಡಿನಲ್ಲಿ ಹುಟ್ಟಿ ಬೆಳೆದ ನನಗೆ, ವಸಂತನ ಆಗಮನದ ಸಂಭ್ರಮ ಅಷ್ಟಾಗಿ ಗೊತ್ತಿಲ್ಲ. ಅಲ್ಲಿ ನಿತ್ಯ ವಸಂತ! ಇಲ್ಲಿ ಬದಲಾವಣೆ ನಿರಂತರ.

ನಿತ್ತ ಹರದ್ದ್ವರ್ಣ ಕಾಡಿನಲ್ಲಿ ವರ್ಷವೆಲ್ಲ ಬದುಕು; ಹಾಗಾಗಿ ಬದುಕಿಗಾಗಿ ಹೊರಾಟ. ತಾ ಮುಂದು ತಾ ಮುಂದು ಎಂದು ಎತ್ತರ ಬೆಳೆಯುವ ಸ್ಪರ್ಧೆ. ಇಲ್ಲಿ, ಬೆಳಕಿಗೇ ತತ್ವಾರ. ಬಂದಾಗ ಸಂಭ್ರಮ; ಜನರಿಗೆ ಮಾತ್ರವಲ್ಲ. ಸಸ್ಯಗಳಿಗೆ ಕೂಡ.

ಐದು ತಿಂಗಳು ಬದುಕು ಸಾದ್ಯವಿಲ್ಲವೆಂದು ನೆಲದಲ್ಲಿ ಅಡಗಿ ಕುಳಿತ ಸಸ್ಯಗಳೆಲ್ಲ ಮೊದಲ ತಲೆ ಹೊರ ಚಾಚಲು ಪ್ರಾರಭ. ಸ್ವಾಗತಕ್ಕೆ ಎಷ್ಟೋಂದು ಅಲಂಕಾರ?

ನೀ ಬರೋ ಹಾದಿಯಲಿಹಾಸಿಹೆ ಹೂವಿನಲಿ.

ಇಂತದೇ ಚಿತ್ರಗಳ ರಾಶಿ ಬಿದ್ದಿದೆ, ನನ್ನ ಕಂಪ್ಯೂಟರಿನ ಫೋಲ್ಡರಿನಲ್ಲಿ. ಯಾವುದನ್ನು ಆಯಲಿ, ಯಾವುದನ್ನ ಬಿಡಲಿ?

ಇನ್ನಷ್ಟು ಚಿತ್ರಗಳು, ಬರಹಕ್ಕೆ ಸೇರಿಸುತ್ತೇನೆ. ಇನ್ನೊಂದೆರಡು ದಿನಗಳಲ್ಲಿ.

ಜರ್ಮನಿಯ ಹಳ್ಳಿಯೊಂದರಲ್ಲಿ ಮೂರು ದಿನ

2010-03-28T16:43:00.023+05:30

ಖಂಡಿತವಾಗಿಯೂ ಇಂಥದ್ದೊಂದು ಹಳ್ಳಿ ಜರ್ಮನಿಯಲ್ಲಿ ಇರಬಹುದು ಎಂದು ನಾನು ಊಹಿಸಿರಲಿಲ್ಲ.

ಎಂಟೋ ಹತ್ತೋ ಮನೆಗಳು ಇರುವ ಪುಟ್ಟ ಊರು.

ನಮ್ಮ ವಾಹನ ಕಂಡ ತಕ್ಶಣ ಓಡಿ ಬಂದ ಹುಡುಗರ ಗುಂಪು;
ಕಿಟಕಿಯ ಅಂಚಿನಲ್ಲಿ ಕದ್ದು ನೋಡುವ ಮುಖಗಳು;

ಕ್ಯಾಮರಾ ತೆಗೆದಾಗ ಮಾಯ!.

ಥೇಟ್ ನಮ್ಮ ಜೋಯಿಡಾದ ಹಳ್ಳಿಗಳ ಅನುಭವವಾಗಿತ್ತು.

ನಾನು ನೋಡಲು ಹೋಗಿದ್ದು "ಬ್ಲೂಮಬರ್ಗರವಾಲ್ಡ" ಎನ್ನುವ ಅರಣ್ಯ
ಪ್ರದೇಶವನ್ನು. ಪಕ್ಕದ 'ವಾರ್ಟಿನ್' ಹಳ್ಳಿಯಲ್ಲಿ ನಮ್ಮ ವಾಸ.

ಇಲ್ಲಿಂದ ತುಸು ದೂರದ 'ಕಾರ್ಲ್ಸ ಬರ್ಗ' ಎನ್ನುವ ಈ ಹಳ್ಳಿಯಲ್ಲಿ ವಾಹನ ನಿಲ್ಲಿಸಿ, ನಡೆದು ಹೋಗಬೇಕಿತ್ತು.

ಪೋಲಂಡಿನ ಗಡಿಯಂಚಿನಲ್ಲಿರುವ ಈ ಹಳ್ಳಿಯಲ್ಲಿ ಸುತ್ತಾಡುವಾಗ ನಮ್ಮ ಅರೆ ಮಲೆನಾಡಿನ ಭಾಗದಲ್ಲಿ ಮಳೆಗಾಲದ ನಂತರ ಸುತ್ತಾಡಿದ ಅನುಭವವಾಗುತ್ತದೆ.

ಕಣ್ಣಿಗೆ ಕಾಣಿಸುವಷ್ಟು ದೂರ ಹಸಿರು ಬಯಲುಗಳು; ಟ್ರ್ಯಾಕ್ಟರುಗಳು.

ಆದರೆ ಜನ ಮಾತ್ರ ಕಡಿಮೆ.

ಲ್ಯಾಂಡಸ್ಕೇಪಿನ ಭಾಗವೇನೋ ಎನ್ನಿಸುವ ಗಾಳಿ ಗಿರಣಿಗಳು ಎಲ್ಲೆಡೆ ಕಾಣಿಸುತ್ತವೆ!

ಕಾಂಪೋಷ್ಟ ತಯಾರಿ. ಪ್ಲಾಸ್ಟಿಕ ಹಾಳೆಗಳನ್ನು ಮುಚ್ಚಿ ಹಳೆ ಟೈರ ಗಳ ಹೊದಿಕೆ.

ಛಳಿಗಾಲ ಈಗಷ್ಟೇ ಮುಗಿದದ್ದರಿಂದ ಹೊಲದ ತಯಾರಿ ಜೋರಾಗಿಯೇ ನಡೆದಿದೆ.

ಬೆಳೆ ಅಂದರೆ ಹೆಚ್ಚಿನ ಭಾಗ ಹುಲ್ಲು!

ಅಲ್ಲಲ್ಲಿ ಕಳೆದ ವರ್ಷ ಜೋಳ ಬೆಳೆದ ಕುರುಹುಗಳು ಕಾಣುತ್ತದೆ.

ನಾನು ಈ ವರೆಗೆ ನೋಡಿದ ಎಲ್ಲ ಕೊಟ್ಟಿಗೆಗಳೂ ಪ್ಯಾಕ್ಟರಿಯನ್ನ ನೆನಪಿಸುತ್ತಿದ್ದವು.

ಅವು ಇರುವ ಅವಸ್ಥೆಯನ್ನು ನೋಡಿದರೆ,

"ಹುಲ್ಲು ಹಾಕಿದರೆ, ಹಾಲು ತಯಾರಿಸುವ ಯಂತ್ರಗಳ" ಹಾಗೆ ಕಾಣಿಸುತ್ತದ್ದವು.

ಮೊದಲ ಬಾರಿ ಬಯಲಲ್ಲಿ ಆರಾಮಾಗಿ ಸುತ್ತಾಡುವ ದನಗಳನ್ನು ನೋಡಿದ್ದೆ.

ನಮ್ಮೊಡನಿದ್ದ ಪ್ರೊಫೆಸರ ಟೀಮೊ, ದನಗಳ ಹಾಗೆ ಕೂಗಿದರೆ,

ಎಲ್ಲ ದನಗಳೂ ನಮ್ಮ ಸುತ್ತಮುತ್ತ!

ತಿರುಗಿ ಬೇಲಿಯೊಳಗೆ ಕಳಿಸುವವರೆಗೆ ನಾವೂ ದನ ಕಾಯುವವರೇ!

ಒಟ್ಟೂ ಒಂಭತ್ತು ದೇಶದವರಿರುವ ನಮ್ಮ ತಂಡ ಕೆಲಹೊತ್ತು

"ಅಂತರಾಷ್ಟ್ರೀಯ ದನ ಕಾಯುವವರ ತಂಡ" ವಾಗಿತ್ತು.

ವರ್ಷದಲ್ಲಿ ನಾಲ್ಕೈದು ತಿಂಗಳು ಮಾತ್ರ ಬೆಳೆ ಬೆಳೆಯಲು ಸಾಧ್ಯ.

ಉಳಿದೆಲ್ಲ ಸಮಯ ಛಳಿ; ಹಿಮ ತುಂಬಿರುವುದೇ ಹೆಚ್ಚು.

ಹಾಗಾಗಿ ವರ್ಷಕ್ಕೆ ಬೇಕಾಗುವಷ್ಟು ಹುಲ್ಲು ಬೇಸಿಗೆಯಲ್ಲೇ ಬೆಳೆದಿಟ್ಟುಕೊಳ್ಳಬೇಕು .

ಹಿಮದಲ್ಲಿ ಹಾಳಾಗದಂತೆ ಪ್ಲಾಸ್ಟಿಕ ಹೊದಿಕೆ ಹಾಕಿದ, ರೋಲರಿನ ಹಾಗೆ ಕಾಣುವ ಹುಲ್ಲಿನ ಪಿಂಡಿಗಳು ಅಲ್ಲಲ್ಲಿ ಸಾಮಾನ್ಯ.

ಜೇನ್ಮನೆ:

ಸಣ್ಣ ಕೊಳದ ಎದುರು ಎಲ್ಲ ಖುರ್ಚಿ ಹಾಕಿ ಕುಳಿತುಕೊಂಡಿದ್ದೆವು. ಒಂದಿಷ್ಟು ಜೇನು
ಹುಳುಗಳು ಬಂದು ಹೋಗುತ್ತಿರುವುದನ್ನು ಗಮನಿಸುತ್ತಿದ್ದೆ.

ಅವು ನಮ್ಮಲ್ಲಿ ಕೆಲ ವರ್ಷಗಳ ಹಿಂದೆ ಪರಿಚಯಿಸಲ್ಪಟ್ಟ ವಿದೇಶಿ ಜೇನು;

ಏಪಿಸ್ ಮೆಲ್ಲಿಫೆರಾಗಳು.

ಪೆಟ್ಟಿಗೆ ಎಲ್ಲಿ ಇರಬಹುದು ಎಲ್ಲೆಡೆ ಹುಡುಕಾಡಿದೆ.

ನಂತರ ಸಿಕ್ಕ ರೈತನೊಬ್ಬನೊಡನೆ ವಿಚಾರಿಸಿದರೆ, ಮನೆಯೊಂದನ್ನು ತೋರಿಸಿದ.

ಹೋಗಿ ನೋಡಿದರೆ, ಮನೆಯ ಕಿಟಕಿಗಳಲ್ಲೆಲ್ಲ ಜೇನು ಹುಳುಗಳು ಹೊರ ಬರುತ್ತಿದ್ದವು.

ಅದು ಜೇನು ಸಾಕಲು ಕಟ್ಟಿದ ಮನೆ. ಜೇನಿನ ಪೆಟ್ಟಿಗೆ ಅಲ್ಲ; ಅದೊಂದು ಜೇನ್ಮನೆ!.

ಮನೆಯ ಒಂದು ಗೋಡೆಯೇ ಬಹುಮಹಡಿಯ ಜೇನು ಪೆಟ್ಟಿಗೆ.

ಮನೆಯ ಒಳಗಡಯಿಂದ ಪೆಟ್ಟಿಗೆಯ ನಿರ್ವಹಣೆ ಸುಲಭ.

ಅಲ್ಲೇ ತುಪ್ಪ ತೆಗೆಯುವ ಯಂತ್ರ; ಮತ್ತಿತರ ಪಕರಣಗಳು.

ಜೇನು ಸಂಸಾರಕ್ಕೆ ತೊಂದರೆ ಆಗದಂತೆ ಜೇನಿನ ನಿರ್ವಹಣೆ ಸಾಧ್ಯ.
ಆದರೆ ನಮ್ಮ ಜೇನಿನ ಪೆಟ್ಟಿಗೆ ಹೀಗೆ ಹತ್ತಿರ ಇದ್ದರೆ, ಅವುಗಳ ನಡುವೆ ಕಾದಾಡಿ ಸಾಯುವ
ಸಾಧ್ಯತೆ ಇದೆಯೇನೋ!

(ಹತ್ತಿರ ಇರುವ ಎರಡು ಪೆಟ್ಟಿಗೆಯ ಹುಳುಗಳು ಹೀಗೆ ಕಾದಾಡಿದ್ದನ್ನು ಒಮ್ಮೆ ನೋಡಿದ್ದೇನೆ)

ಪರಿಣಿತರೇ ಹೇಳಬೇಕು!.

ಕೋಳಿ , ಬಾತು ಕೋಳಿಯಗಳ ಸಾಕಣೆ ಸಾಮಾನ್ಯ. ತಂತಿಯ ಬೇಲಿಯ ಹಾಕಿ, ನಡುವೆ ಒಂದು ಕೊಳ
ನಿರ್ಮಿಸಿ, ಬಾತು ಕೋಳಿಗಳನ್ನು ಬಿಡುತ್ತಾರೆ.

ಸಬ್ಸಿಡಿಯೇ ಆಧಾರ ಬೆಳೆ ಬೆಳೆಯಲು:

ಬೆಳೆಗಳು ನಿರ್ಧಾರ ಆಗುವುದು ಸರಕಾರ ನೀಡುವ ಸಬ್ಸಿಡಿಯ
ಆಧಾರದ ಮೇಲೆ. ಇಷ್ಟು ವರ್ಷ ಭೂಮಿ ಯನ್ನು ಹಾಗೆ ಬಿಟ್ಟರೂ ಸರಕಾರದಿಂದ ಸಬ್ಸಿಡಿ
ಸಿಗುತ್ತಿತ್ತಂತೆ. ಈ ವರ್ಷ ಅದನ್ನು ತೆಗೆದು ಹಾಕಿದ್ದಾರೆ. ಆದರೆ ಬೇರೆ ಬೇರೆ ಬೆಳೆಗಳಿಗೆ
ಬೇರೆ ಬೇರೆ ರೀತಿಯ ಸಬ್ಸಿಡಿಗಳಿವೆ. ಬಯಲು ಗದ್ದಗೆಳನ್ನು ಹೂಡಿ ಹುಲ್ಲು ಬೆಳೆಯುವಂತೆ
ಮಾಡಲು ಇದ್ದ ಸಬ್ಸಿಡಿ ಸಹ ಈಗ ಕಡಿಮೆಯಾಗಿದೆಯಂತೆ.

ಹಾಗಾಗಿ ಮೊದಲು ವರ್ಷಕ್ಕೆ ನಾಲ್ಕೈದು ಬಾರಿ ಟ್ರ್ಯಾಕ್ಟರ್ ಓಡಾಡುತ್ತಿದ್ದ ಗದ್ದಗೆಳಲ್ಲಿ ಈಗ ವರ್ಷಕ್ಕೆ ಒಮ್ಮೆ ಮಾತ್ರ
ಓಡುತ್ತದೆಯಂತೆ. ನಮ್ಮ ಬೇರು ಹುಳುಗಳ ಜಾತಿಗೆ ಸೇರಿದ ಚಿಟ್ಟೆಯ ಸಂತತಿ, (ಈ ಚಿಟ್ಟೆಯ ಬಗ್ಗೆ
75ಕ್ಕೂ ಹೆಚ್ಚು ಸಂಶೋಧನಾ ಪ್ರಭಂಧಗಳು ಪ್ರಕಟವಾಗಿವೆ!) ಹೀಗೆ ಪದೆ ಪದೆ ಹೂಟೆ ಮಾಡುವುದರಿಂದ
ವಿನಾಶದ ಅಂಚಿಗೆ ಹೋಗಿದ್ದಕ್ಕೆ, ಚಿಟ್ಟೆ ಪ್ರಿಯರು ಗಲಾಟೆ ಮಾಡಿದ ಪರಿಣಾಮ!.

ಯುವಕರ ನಗರ ವಲಸೆ ಇಲ್ಲೂ ಒಂದು ಸಮಸ್ಯೆಯೇ.

" ಕೆಲ ವರ್ಷಗಳ ಹಿಂದೆ 1800 ಇದ್ದ ನಮ್ಮ ಊರಿನ ಜನಸಂಖ್ಯೆ ಈಗ 1200ಕ್ಕೆ ಇಳಿದಿದೆ" ಎನ್ನುತ್ತಾನೆ, ಕಾರ್ಸ್ಟನ್.

"ಏನೂ ಯೋಚನೆ ಮಾಡಬೇಕಾಗಿಲ್ಲ. ಕೃಷಿ ಬಗ್ಗೆ ನಿಜವಾಗಿ ಆಸಕ್ತಿ ಇರೋರು ಮಾತ್ರ ಆಗ ಕೃಷಿಕರಾಗುತ್ತಾರೆ, ಅಷ್ಟೆ" ಎಂದ ಹತ್ತಿರದಲ್ಲೇ ಇದ್ದ ಕ್ರಿಸ್ತಿಯನ್. ಸ್ನಾತಕೋತ್ತರ ವಿದ್ಯಾಭ್ಯಾಸದ ನಂತರವೂ ಹಳ್ಳಿಯಲ್ಲೇ ಇರುವ ನಿರ್ಧಾರ ಮಾಡಿದ ಯುವಕ.

ನನ್ನ ಎಷ್ಟೋ ದಿನಗಳ ಪ್ರಶ್ನೆಗೆ ಉತ್ತರ ಸಿಕ್ಕಿತ್ತು!

ಇಪ್ಪತ್ತು ವರ್ಷಗಳ ಹಿಂದೆ ಜರ್ಮನಿಯ ಗೋಡೆ ಮುರಿದು ಎರಡು ಜರ್ಮನಿಗಳು ಒಂದಾದಾಗ, ಪೂರ್ವ ಜರ್ಮನಿಯ ಈ ಭಾಗದ ಜನ ಪಶ್ಚಿಮದತ್ತ ವಲಸೆ ಹೋದರು. ಸಾಕಷ್ಟು ಅಭಿವೃಧ್ದಿ ಹೊಂದಿದ ಭಾಗದಲ್ಲಿ ಉದ್ಯೋಗಾವಕಾಶ ಹೆಚ್ಚಿದ್ದರಿಂದ.

ಕಮ್ಯನಿಷ್ಟ ಆಡಳಿತದ ಕಾಲದಲ್ಲಿ ಸರಕಾರದ ಹಿಡಿತದಲ್ಲಿದ್ದ ಜಮೀನುಗಳು ಈಗ ಖಾಸಗಿ ಜಮೀನುಗಳಾಗಿವೆ.

"ಮೊದಲಾದರೆ ಸರಕಾರವೇ ಎಲ್ಲರಿಗೆ ಉದ್ಯೋಗವೊಂದನ್ನು ಕೊಡುತ್ತಿತ್ತು.
ಈಗ ಅವರೇ ಹುಡುಕಿಕೊಳ್ಳಬೇಕು. ಹಾಗಾಗಿ ನಿರುದ್ಯೋಗ ಸಮಸ್ಯೆಯೂ ಹೆಚ್ಚಾಗುತ್ತಿದೆ.

ಕೆಲವು ಕಡೆ ಶೇ 30% ನಿರುದ್ಯೋಗಿಗಳಿದ್ದಾರೆ."

ಹಳ್ಳಿಯಲ್ಲೇ ಬೆಳೆದು ಈಗ ನಗರದಲ್ಲಿ ಉದ್ಯೋಗದಲ್ಲಿರುವ ಓಲೆಯ ಅಭಿಪ್ರಾಯ.

ಹಿಮದ ಹಾದಿಯಲ್ಲಿ ...............

2010-01-03T01:53:00.006+05:30

ಖಂಡಿತವಾಗಿಯೂ ಅದು ನನ್ನ ಜೀವನದ ಅತ್ಯಂತ ಛಳಿಯ ದಿನ!

ನಾನು ನಡುಗುವುದನ್ನು ನೋಡಿ ನೇಪಾಳದ ಸ್ನೇಹಿತ ತನ್ನ ರೇನ್ ಕೋಟ್ ತೆಗೆದುಕೊಟ್ಟ.

ಅದನ್ನು ಹಾಕಿ ಕೊಳ್ಳುತ್ತಾ ನನ್ನ ಮೈಮೇಲೆ ಇದ್ದ ಬಟ್ಟೆ ಲೆಕ್ಕ ಹಾಕಿದರೆ .......
................ ಆರು ಪದರು ಹೊದಿಕೆ ಇತ್ತು.

.........ಆದರೂ ಛಳಿ.

ಬೆಂಗಳೂರಿನಿಂದ ಒಯ್ದ ಉಲ್ಲನ್ ಗ್ಲೌಸ್ನ ನಡುವೆ ತೂರಿ ಬರುವ ಛಳಿಯಿಂದಾಗಿ, ಉಗುರು ಕಿತ್ತು ಹೋಗುವಂತೆ ನೋಯುತ್ತಿತ್ತು.

ಜರ್ಮನಿಗೆ ಬಂದ ಮರುದಿನವೇ ಹಿಮ ಪಾತದ ಅನುಭವವನ್ನು ಮೊದಲ ಬಾರಿಗೆ ಪಡೆದಿದ್ದೆ.
ಕ್ಲಾಸಿಗೆ ಹೋಗುವಾಗ ಎಲ್ಲಡೆ ಬೆಳಕಿತ್ತು.

ಗಿಡಗಳೆಲ್ಲ ಎಲೆ ಉದುರಿಸಿ, ಬರಡಗಾಗುತ್ತಿತ್ತು.

ಎರಡು ಘಂಟೆ, "ಭೂಮಿಯ ಬಿಸಿ ಏರುವಿಕೆ"ಯ ಬಗ್ಗೆ ಎರಡು ಘಂಟೆ ಲೆಕ್ಚರ್ ಕೇಳಿ ಹೊರಬಂದರೆ, ನಾನು ಬಂದ ದಾರಿ, ಊರು ಎಲ್ಲ ಬದಲಾದಿದೆ.

ಸಕ್ಕರೆ ಹಾಸಿದ ನೆಲದ ಮೇಲೆ, ಬಿಳಿ ಎಲೆಯ ಮರಗಳು.

ಊರಿಗೆ ಬಂದ ಹೊಸದು. ನನಗೆ ದಾರಿ ಬೇರೆ ಸರಿಯಾಗಿ ಗೊತ್ತಿಲ್ಲ. ಈಗಂತೂ ದಾರಿಯೇ ಇಲ್ಲ.

ಬ್ರಾಜ಼ಿಲ್ ನ ಸ್ನೇಹಿತ ಲಿಯೋಗೆ "ನನ್ನ ಮನೆವರೆಗೆ ಬಿಡುವ ಜವಾಬ್ದಾರಿ ನಿನ್ನದು" ಎಂದೆ.

ನನಗಿಂತ ಮೊದಲೇ ಬಂದ ಆತ, ಸ್ವಲ್ಪ ನಗರದ ಬಗ್ಗೆ ಸ್ವಲ್ಪ ಹೆಚ್ಚು ತಿಳಿದುಕೊಂಡಿದ್ದ.

ಮೊದಲ ಬಾರಿ ಹಿಮದ ಹಾದಿಯಲ್ಲಿ ನಡೆಯುತ್ತಿದ್ದೆ....

ಸೈಕಲ್, ಕಾರು ಎಲ್ಲದರ ಮೇಲೆ ಹಿಮ. ಸೈಕಲ್ ಹೊಡೆಯುವ ಹಾಗಿಲ್ಲ. ಜಾರುತ್ತದೆಯೇನೋ ಎನ್ನುವ ಭಯ.

ತಳ್ಳಿಕೊಂಡೆ ಮನಗೆ ಬಂದಾಗ, ಆಗಲೇ ರಾತ್ರಿ. ಸಮಯ ಮಾತ್ರ ಇನ್ನೂ ಮದ್ಯಾಹ್ನ ನಾಲ್ಕು ಘಂಟೆ. (ಛಳಿಗಾಲದಲ್ಲಿ ೭ರಿಂದ ೮ ಘಂಟೆ ಮಾತ್ರ ಹಗಲು).

ರೂಮಿಗೆ ಬಂದ ತಕ್ಷಣ ಕಂಪ್ಯೂಟರ್ ಹಚ್ಚಿ ಹವಾಮಾನ ವರದಿ ನೋಡಿದರೆ ಉಷ್ಣತೆ - ೧೪ಕ್ಕೆ ಇಳಿದಿದೆ!
ಅದನ್ನು ನೋಡುತ್ತಿದ್ದಂತೆ ಮತ್ತೂ ಛಳಿ ಹೆಚ್ಚಾಯಿತು.

ನಮ್ಮೂರಲ್ಲಿ "ಮೂರು ಕಂಬಳಿ ಛಳಿ' (ಅದೇ ನಮ್ಮ ಛಳಿಯ ಅಳತೆಗೋಲು) ಅಂದರೂ ಹೆಚ್ಚೆಂದರೆ ೧೪- ೧೫ ಡಿಗ್ರೀ ಸೆಂಟಿಗ್ರೇಡ್ ಇರುತ್ತದೆ. ಆದರೆ ಇವತ್ತು - ೧೪. ನಮ್ಮ ಛಳಿಗಿಂತ ೩೦ ಡಿಗ್ರಿ ಕಡಿಮೆ!

ಎಲ್ಲರಿಗೆ ಹೊಸ ವರ್ಷದ ಶುಭಾಷಯ......

.................... ಈ ಹಿಮದ ಊರಿಂದ! ......

ಕಾಡಿನ ಹುಚ್ಚು

2009-11-16T00:17:00.003+05:30

ಒಮ್ಮೊಮ್ಮೆ ಹಾಗೇ ಅನ್ನಿಸಿದ್ದಿದೆ.
ಹುಚ್ಚು ಸ್ವಲ್ಪ ಹೆಚ್ಚಾಯಿತೇನೋ ಅಂತ!
ಎಲ್ಲರೂ ಕಂಪ್ಯೂಟರ್, ಸಾಫ್ಟವೇರ್ ಅಂತೆಲ್ಲ ಮುಗಿ ಬೀಳ್ತಾ ಇದ್ದ ಕಾಲದಲ್ಲಿ, ಅನಾಯಾಸವಾಗಿ ಸಿಕ್ಕ ಅದೇ ಕೆಲಸವನ್ನು ಬಿಟ್ಟು "ಕಾಡಿಗೆ ಹೋಗ್ತೇನೆ" ಅಂದಾಗ ಕರೆದು ಕುಡ್ರಿಸಿಕೊಂಡು ಬುದ್ಧಿ ಹೇಳಿದ ಗೆಳೆಯರ ನೆನಪು ಇನ್ನೂ ಕಣ್ಣ ಮುಂದಿದೆ.

ಕಾಡು, ವನ್ಯಜೀವಿ ಅದ್ಯಯನ, ಅರಣ್ಯ ಉತ್ಪನ್ನಗಳು, ಪಶ್ಚಿಮ ಘಟ್ಟಗಳು
ಅಂತೆಲ್ಲ ಹೇಳ್ತಾ, ಜಮೀನು ಖರೀದಿಸಿ,
ಕೃಷಿ ಮಾಡ್ತಾ ಇದ್ದು ಬಿಡಬೇಕೆಂದು ಕೊಂಡು,
ಖರೀದಿಸಿದ ಹೊಸ ಜಮೀನಿನಲ್ಲೇ ಒಂದು ಮನೆ ಕಟ್ಟಿಸಿ ಉಳಿಯುತ್ತಿದ್ದ ಹಾಗೆ,
ಇದ್ದಕ್ಕಿದ್ದಂತೆ, ಈಗ ಜರ್ಮನಿಗೆ ಬಂದು ಸೇರಿದ್ದೇನೆ.

ಬರ್ಲಿನ್ ಸಮೀಪದ ಗ್ರೀಪ್ಸ್ ವಾಲ್ಡ್ ವಿಶ್ವವಿದ್ಯಾಲಯದಲ್ಲಿ
ಮತ್ತೆ ಪಕ್ಕಾ ವಿದ್ಯಾರ್ಥಿಯಾಗುತ್ತಿದ್ದೇನೆ.
"ಕಾಡಿನ ಮಧ್ಯನೇ ಹುಟ್ಟಿ ಬೆಳೆದರೂ ಕಾಡಿನ ಹುಚ್ಚು ಯಾಕನೋ?"
ಅಂತ ಆಯಿ ಅಗಾಗ ಕೇಳುವ ಪ್ರಶ್ನೆಗೆ ಉತ್ತರವಂತೂ ನನ್ನಲ್ಲಿ ಇಲ್ಲ.

ಕಾಡು ನನ್ನ ಪಾಲಿನ ಹುಚ್ಚಂತೂ ಹೌದು.
ಅದೇ ಈ ವರೆಗೆ ನೆದರ್ ಲ್ಯಾಂಡ್ಸ್, ನೇಪಾಳ, ಫಿಲಿಪ್ಪನ್ಸ್, ಥೈಲ್ಯಾಂಡ್, ಮತ್ತೆ ಈಗ ಜರ್ಮನಿಗೆ ಕರೆದು ತಂದದ್ದು.

ಕ್ಷಮಿಸಿ ಬರೆಯುತ್ತೇನೆ ಅಂತ ಹೇಳಿದವನಿಗೆ ಈ ಬದಲಾವಣೆ ಕಾರಣದಿಂದ,
ಅಥವಾ ಹಳ್ಳಿಯ ಸೀಮಿತ ಅಂತರ್ಜಾಲ ಸೌಲಭ್ಯದಿಂದ ಬರೆಯಲಾಗಲಿಲ್ಲ
ಅಂತ ಹೇಳಲು ನನ್ನ ಮನಸ್ಸು ಒಪ್ಪುತ್ತಿಲ್ಲ.
ಎಲ್ಲಕ್ಕೂ ಆಲಸ್ಯವೇ ಕಾರಣ ಅಂತ ಪ್ರಾಮಾಣಿಕವಾಗಿ ಒಪ್ಪಿಕೊಳ್ಳಲೇಬೇಕು.
ಈಗಾದರೂ ಕಾರಣ ಹೇಳದೇ ಬರೆಯುವ ಪ್ರಯತ್ನ ಮಾಡಲೇ ಬೇಕು.

ಸಾರಿ! ಕಾಯಿಸಿದ್ದಕ್ಕೆ!

2009-06-21T20:16:00.001+05:30

ಸ್ನೇಹಿತರೇ,
ತುಂಬಾ ದಿನಗಳಿಂದ ಬ್ಲಾಗ ಬರೆಯಲು ಸಾಧ್ಯವಾಗಲಿಲ್ಲ. ಕ್ಷಮಿಸಿ. ಸುತ್ತಾಟ ಸ್ವಲ್ಪ ಹೆಚ್ಚಾಯಿತು. ಖಂಡಿತ ಇನ್ನೊಂದೆರಡು ದಿನಗಳಲ್ಲಿ ಬರೆಯುತ್ತೇನೆ.
ಧನ್ಯವಾದಗಳು,
ಬಾಲು ಸಾಯಿಮನೆ

ಕೊನೆಯ ಪುಟವೋ? ಮೊದಲ ಪುಟವೋ?

2009-03-23T22:58:00.003+05:30

ದಾಂಡೇಲಿ ಕಾಡಿನಲ್ಲಿ ಈಗ ಶೋಕಾಚರಣೆ. ಆರು ದಶಕಗಳಿಂದ ಕಾಡಿಗೆ ಸೇವೆ ಸಲ್ಲಿಸಿದವರು ಕರ್ತವ್ಯ ಮುಗಿಸಿ ಹೊರಡುವ ತಯಾರಿಯಲ್ಲಿದ್ದಾರೆ.

ಪ್ರತಿ ವರ್ಷ ಎಲೆ ಉದುರಿಸಿ, ಗೊಬ್ಬರ ಹಾಕಿ, ಬೇರೆ ಯಾರೂ ಬರದ ಹಾಗೆ ಮುಳ್ಳು ಬೇಲಿ ಕಟ್ಟಿ ಕಾಡನ್ನು ಬೆಳೆಸುವ ಪ್ರಯತ್ನ ಮಾಡಿದವರು, ಕಾಡಿಗೆ ವಿದಾಯ ಹೇಳ ಹೊರಟಿದ್ದಾರೆ.

ಎಲ್ಲಿ ಬೆಂಕಿ ಹಾಕಬಹುದೆಂಬ ಅತಂಕ. ......

ಇದೊಳ್ಳೆ ಕಥೆ!

ಕರ್ತ್ಯವ್ಯ ಮುಗಿಸಿ ಹೊರಟರೆ ಯಾರು ಬೆಂಕಿ ಹಾಕುತ್ತಾರೆ ಎಂಬ ಪ್ರಶ್ನೆಯೆ?

ಕರ್ತ್ಯವ್ಯ ಮುಗಿಸಿ ಹೊರಟವರು; ಮನುಷ್ಯರಲ್ಲ; ಸಸ್ಯ. ಹೆಸರು ಬಿದಿರು.
ಆ ವಿದ್ಯಮಾನದ ಹೆಸರು "ಕಟ್ಟೆ".- ಬಿದಿರು ಕಟ್ಟೆ.

ಬಿದಿರಿನ ಕಟ್ಟೆ ಅಂದರೆ ಹೂ ಬಿಡುವುದು.
ಬಿದಿರು ಹೂ ಬಿಡುವುದು ನಲವತ್ತರಿಂದ ಅರವತ್ತು ವರ್ಷಗಳಿಗೊಮ್ಮೆ ಮಾತ್ರ ಎಂದು ಎಲ್ಲರಿಗೂ ಗೊತ್ತಿರಬಹುದು.

ಹೂ ಬಿಟ್ಟು ಬೀಜವಾಗುವ ಈ ಪ್ರಕ್ರಿಯೆ ಬಿದಿರಿನ ಜೀವನದಲ್ಲಿ ಒಮ್ಮೆ ಮಾತ್ರ.

ಅಕ್ಕಿಯ ಹಾಗೆ ಕಾಣುವ ಬಿದಿರ (ಬೀಜ) ಅಕ್ಕಿ ಬೇಯಿಸಿ ಊಟ ಮಾಟಬಹುದು.

'ಜಡ್ಡು ಭತ್ತ'ದ ಹಾಗೆ ಕಾಣುವ ಈ ಅಕ್ಕಿ ರುಚಿ ಮಾತ್ರ ಸ್ವಲ್ಪ ಭಿನ್ನ.

ಬಿದಿರಿನ ಕಟ್ಟೆಗೆ ಬರಗಾಲಕ್ಕೆ ಯಾವಗಲೂ ಸಂಬಧವನ್ನು ಕಲ್ಪಿಸಲಾಗುತ್ತದೆ.

ನನ್ನಜ್ಜ ಮಾತಿನ ಮಧ್ಯ , "ಬಿದಿರು ಕಟ್ಟೆ ವರ್ಷ" ಎಂದು ಅದನ್ನೊಂದು ಮೈಲು ಗಲ್ಲಾಗಿ ಉಪಯೋಗಿಸತ್ತಿದ್ದುದು ನೆನಪಿದೆ. ಬಿದಿರು ಕಟ್ಟೆ ಯನ್ನು ನೋಡಿದ ಜನಕ್ಕೆ ಅದೊಂದು ಮರೆಯಲಾಗದ ವರ್ಷ ಎಂದೆನಿಸುತ್ತದೆ. ಬಿದಿರಿನ ಅಕ್ಕಿ ಊಟ ಮಾಡಿ ಬದುಕಿದ್ದನ್ನು ನೆನಪಿಸುವ ಜನ ಇನ್ನೂ ನಮಗೆ ಅಲ್ಲಲ್ಲಿ ಸಿಗುತ್ತಾರೆ.

ಕರ್ನಾಟಕದಲ್ಲಿ ಬಿದಿರ ಕಟ್ಟೆ ಪ್ರಾರಂಭವಾಗಿ ನಾಲ್ಕೈದು ವರ್ಷಗಳೇ ಆದವು. ಕೆಲವು ವರ್ಷಗಳ ಹಿಂದೆ ಭದ್ರಾ ಅಭಯಾರಣ್ಯದಲ್ಲಿ ಬಿದಿರಿಗೆ ಕಟ್ಟೆ ಬಂದು ಎಲ್ಲ ಒಣಗಿ ನಿಂತಾಗ ಬೆಂಕಿ ಬಿದ್ದಿದ್ದರ ಪರಿಣಾಮವಾಗಿ ಕಾಡೆಲ್ಲ ನಾಶವಾಗಿದ್ದು ನೆನಪಿರಬಹುದು.

ದಾಂಡೇಲಿಯಲ್ಲಿ ಕಳೆದ ವರ್ಷದಿಂದ ಬಿದಿರಿಗೆ ಹೂವು ಬರಲು ಪ್ರಾರಂಭವಾಗಿದೆ. ಕಾಡೆಲ್ಲ ಒಣಗಿ ನಿಂತಿದೆ. ಬೆಂಕಿ ಬಿದ್ದರೆ ಕಾಡೆಲ್ಲ ಉರಿದು ಹೋಗುವಂತಾಗಿದೆ. ಅರಣ್ಯ ಇಲಾಖೆ ಸಹ ಆತಂಕದಿಂದಿದೆ.

ಈಶಾನ್ಯ ರಾಜ್ಯಗಳಲ್ಲಿ ಈಗಷ್ಟೇ ಬಿದಿರು ಕಟ್ಟೆ ಮುಗಿದಿದೆ. ಭಾರೀ ಬರಗಾಲ ಬರಬಹುದೆಂಬ ಜನರ ನಿರೀಕ್ಷೆ ಇನ್ನೂ ಜೀವಂತವಾಗಿದೆ. (ಆರ್ಥಿಕ ಹಿಂಜರಿತಕ್ಕೂ ಇದಕ್ಕೂ ಸಂಭಂಧ ಇರಲಿಕ್ಕಿಲ್ಲ ಬಿಡಿ.)

ಸಾಮಾನ್ಯವಾಗಿ ಬಿದಿರಿನ ಅಕ್ಕಿ ಹೇರಳವಾಗಿ ಸಿಗುವುದರಿಂದ ಇದನ್ನು ತಿಂದು ಇಲಿಗಳ ಸಂಖ್ಯೆ ಹೆಚ್ಚಾಗುತ್ತದೆ. ನಂತರದಲ್ಲಿ ಅಹಾರ ಇಿಲ್ಲದ ಇಇಲಿಗಳು ಸಮೀಪದ ಗದ್ದೆಗಳಿಗೆ ಧಾಳಿ ಇಟ್ಟು ಬೆಳೆ ಹಾನಿ ಮಾಡುತ್ತವೆ. ಅಹಾರ ಿಲ್ಲದ ಿಲಿಗಳು ಸಾವು ಪ್ಲೇಗ ನಂತಹ ರೋಗಕ್ಕೆ ಕಾರಣವಾಗುತ್ತದೆ ಎನ್ನುವುದು ಸಾಮಾನ್ಯವಾಗಿ ಸಿಗುವ ವಿವರಣೆ.

ಅರಣ್ಯ ಇಲಾಖೆಯಂತೂ ಅದಷ್ಟು ಬಾಚಿಕೊಳ್ಳುವ ತಯಾರಿಯಲ್ಲಿದೆ. ಒಣ ಬಿದಿರು ಇದ್ದರೆ ಬೆಂಕಿ ಬಿದ್ದಾಗ ಆರಿಸುವುದು ಸಾಧ್ಯವಿಲ್ಲವೆಂಬ ನೆಪವೊಡ್ಡಿ ನಿರಂತರ ಬಿದಿರು ಕಡಿದು ಸಾಗಿಸುತ್ತಿದೆ.

ಬಿದಿರು ಹಾಗೆ ಒಮ್ಮೆಲೆ ಏಕೆ ಹೂ ಬಿಟ್ಟು ಸತ್ತು ಹೋಗುತ್ತದೆ?

ವೈಜ್ಣಾನಿಕ ಕಾರಣಗಳು ಹಲವಾರು ಅಂತರಜಾಲದಲ್ಲಿ ಸಿಗಬಹುದು.

ಆದರೆ ನನಗನ್ನಿಸುವುದು, ಅದೊಂದು ನಿಸರ್ಗ ಚಕ್ರದ ಬಾಗ ಎಂದು ಮಾತ್ರ. ಒಂದು ಪಾಳು ಬಿದ್ದ ಜಾಗದಲ್ಲಿ ಸಸ್ಯ ಬೆಳೆಯುವಪ್ರಕ್ರಿಯೆಯನ್ನೊಮ್ಮೆ ನೋಡಿ. ಕಳೆ, ಹುಲ್ಲು, ಒಂದೊಷ್ಟು ಪೊದೆ ಜಾತಿಯ ಸಸ್ಯಗಳು, ಹೀಗೆ ಒಂದಾದ ಮೇಲೊಂದರಂತೆ ಸಸ್ಯಗಳು ಬೆಳೆಯುತ್ತವೆ. ಅವು ಅಲ್ಲೇ ಬಿದ್ದು ಕೊಳೆತು ಮಣ್ಣು ಮತ್ತಷ್ಟು ಫಲವತ್ತಾಗಿ, ಆ ಸಸ್ಯಗಳ ನಡುವೆ ಮರಗಳಗುವ ಸಸ್ಯಗಳ ಬೀಜ ಮೊಳಕೆಯೊಡೆಯುತ್ತವೆ.

(ಹಳೆ ಮೈಸೂರು ಬಾಗದಲ್ಲಿ "ನಿನ್ನ ಮನೆ ಎಕ್ಕುಟ್ಟೋಗಾ!" ಎಂದು ಬೈಯ್ಯುವುದು ಕೇಳಿರಬಹುದು. . ಸಾಮಾನ್ಯವಾಗಿ ಹಾಳು ಬಿದ್ದ ಜಾಗದಲ್ಲಿ ಮೊದಲು ಬೆಳೆಯುವ ಸಸ್ಯ ಎಂದರೆ ಎಕ್ಕದ ಜಾತಿಯ ಗಿಡ. ಅಂದರೆ ನಿನ್ನ ಮನೆ ಜಾಗದಲ್ಲಿ ಎಕ್ಕದ ಗಿಡ ಹುಟ್ಟಲಿ ಎಂದು.)

ನಿತ್ಯ ಹರಿದ್ವರ್ಣ ಕಾಡಿನಲ್ಲಿ ಗುರಿಗೆ ಜಾತಿಯ ಸಸ್ಯಗಳು ಬೆಳೆಯುತ್ತವೆ. ಕಾಡಿನ ಅಂಚಿನಲ್ಲಿ ಬೆಳೆಯು ಈ ಸಸ್ಯಗಳು, ಸಾಮಾನ್ಯವಾಗಿ ನಾಲ್ಕು ವರ್ಷಕ್ಕೊಮ್ಮೆ ಹೂ ಬಿಢುತ್ತವೆ. ಮಳೆ ಹೆಚ್ಚು ಬೀಳುವ ಈ ಭಾಗದಲ್ಲಿ ನಾಲ್ಕು ವರ್ಷ ಕಾಡನ್ನು ರಕ್ಷಣೆ ಮಾಡಿ, ತರಗೆಲೆ ಹಾಕಿ, ಫಲವತ್ತತೆ ಹೆಚ್ಚಿಸಿದರೆ, ಉಳಿದ ಮರಗಳಾಗುವ ಸಸ್ಯಗಳ ಬೇಜ ಇವುಗಳ ಸಂಧಿಯಲ್ಲಿ ಮೊಳಕೆಯೊಡೆದು, ಬೆಳೆಯುತ್ತದೆ. ಹಾಗೆ ಆ ಮರಗಳು ಬೆಳೆಯಲು ತೊಡಗಿದಾಗ 'ಗುರಿಗೆ' ಅಲ್ಲಿಂದ ಮರೆಯಾಗುತ್ತದೆ. ತನ್ನ ಕರ್ತವ್ಯ ಮುಗಿಯಿತೆಂದು ಪಕ್ಕದ ಹುಲ್ಲುಗಾವಲಿನಲ್ಲಿತ್ತ ಸಾಗುತ್ತದೆ.

ಅರೆ ನಿತ್ಯ ಹರಿದ್ವರ್ಣ ಮತ್ತು ತೇವಾಂಶ ಭರಿತ ಕಾಡಿನಲ್ಲಿ ಇದೇ ಜಾತಿಯ ಇನ್ನೊದು ಗುರಿಗೆ ಇದೆ. ಅದು ಹೂ ಬಿಡುವುದ ಎಂಟು ವರ್ಷಕ್ಕೊಮ್ಮೆ. ಮಳೆ ಕಡಿಮೆ ಬೀಳುವ ಕಾಡಿನಲ್ಲಿ ಮಣ್ಣು ಫಲವತ್ತಾಗಲೂ ಸಮಯಬೇಕಲ್ಲವೇ?

ಹನ್ನೆರಡು ವರ್ಷಕ್ಕೊಮ್ಮೆ ಹೂ ಬಿಡುವ "ಕುರುಂಜಿ"ಯ ಬಗ್ಗೆ ಕೇಳಿರಬಹುದು. ಅದೂ ಸಹ ಈ ಗುಂಪಿನ ಸಸ್ಯವೇ. ಮುನ್ನಾರ್ ನಂತಹ ತೀರ ಇಳಿಜಾರಿನ ಹುಲ್ಲು ಗಾವಲಿನಲ್ಲಿ ಬೆಳೆಯುವ ಸಸ್ಯ.

ಬಿದಿರು ಬೆಳೆಯುವುದು ಎಲೆ ಉದುರಿಸುವ ಕಾಡಿನಲ್ಲಿ. ಅಲ್ಲಿ ಸಾಮಾನ್ಯವಾಗಿ ಬೀಳುವ ಮಳೆ 2000 ಮೀ.ಮೀ ಗಿಂತ ಕಡಿಮೆ. ಕಡಿಮೆ ನೀರನ್ನು ಉಪಯೋಗಿಸಿಕೊಂಡು ಬೂಮಿಯನ್ನು ಫಲವತ್ತ ಮಾಡುವ ಜವಾಬ್ದಾರಿ ಅವಕ್ಕೆ. ಹಾಗಾಗಿ 45 ರಿಂದ 60 ವರ್ಷದವೆರೆಗೆ ಹೂ ಬಿಡುವ ಬಿದಿರುಗಳಿವೆ.

ಎಲೆ ಉದುರಿಸಿ, ತಮ್ಮ ಮುಳ್ಳುಗಳಿಂದ ಬೇಲಿ ಮಾಡಿ ಮೊಳಕೆಯೊಡೆಯುತ್ತಿರುವ ಇತರ ಸಸ್ಯಗಳ ಚಿಗುರುಗಳನ್ನು ಸಂರಕ್ಷಿಸುತ್ತಿದ್ದವು, ತನ್ನ ಕರ್ತ್ವವ್ಯ ಮುಗಿಯಿತೆಂದು ಹೊರಟರೆ, ಮನುಷ್ಯ ಗೀಚುವ ಒಂದು ಬೆಂಕಿ ಕಡ್ಡಿ ಅಷ್ಟೆಲ್ಲ ವರ್ಷದ ಪ್ರಯತ್ನ ವ್ಯರ್ಥಮಾಡಿಬಿಡುತ್ತವೆ.

ಛಲಬಿಡದ ನಿಸರ್ಗ ಮತ್ತೆ ಬಿದಿರನ್ನೇ ಬೆಳೆಸಲು ಪ್ರಾರಂಭಿಸುತ್ತದೆ.

ಹೆಜ್ಜೆ ಅಳಿಸಿ ಹೋಗುವ ಮುನ್ನ.........

2009-03-17T23:01:00.011+05:30

ಆ ಮಣ್ಣು ರಸ್ತೆಯಲ್ಲಿ ಜೀಪು ಸಾಕಷ್ಟು ವೇಗವಾಗಿಯೇ ಹೋಗುತ್ತಿತ್ತು. ಪಕ್ಕದಲ್ಲಿದ್ದ ಸ್ನೇಹಿತ ಸಂಜಯ್ ಗುಬ್ಬಿ ಹೇಳದೇ ಇದ್ದರೆ ಹತ್ತು ವರ್ಷಗಳಿಂದ ಹುಡುಕುತ್ತಾ ಇದ್ದ ಚಿತ್ರವೊಂದು ತಪ್ಪಿಹೋಗುತ್ತಿತ್ತು. ಥಟ್ಟನೆ ನಿಲ್ಲಿಸಿ ಫೋಟೊ ಹೊಡೆದಿದ್ದ್ದೆ ಹೊಡೆದದ್ದು. ಖುಷಿ ಎಷ್ಟಾಗಿತ್ತೆಂದರೆ, ಮೆಮರಿ ಕಾರ್‍ಡ್ ಖಾಲಿ ಆಗುವ ಹಂತಕ್ಕೆ ಬಂದಿತ್ತು.

ಅಷ್ಟೆಲ್ಲ ಆಸಕ್ತಿಯಿಂದ ಹೊಡೆದ ಫೋಟೊ ಯಾವುದೂ ಅಲ್ಲ. ಒಂದು ಹುಲಿ ಹೆಜ್ಜೆಯದು.

ಯಾಕಪ್ಪಾ ಅಷ್ಟೆಲ್ಲ; ನಾಗರಹೊಳೆಗೋ, ಬಂಡೀಪುರಕ್ಕೋ ಹೋಗಿದ್ರೆ ಸುಲಭವಾಗಿ ಸಿಗುತ್ತಿತ್ತು ಅನ್ನಬಹುದು. ಆದರೆ, ಈ ಹೆಜ್ಜೆ ಸಿಕ್ಕಿದ್ದು ದಾಂಡೇಲಿಯಲ್ಲಿ. ಹಾಗಾಗಿ ಅಷ್ಟೆಲ್ಲ ಖುಷಿ ಪಟ್ಟಿದ್ದು.

ನಾನು ದಾಂಡೇಲಿಯ ಕಾಡಿನಲ್ಲಿ ಅಡ್ಡಾಡಲು ಶುರು ಮಾಡಿದ್ದು ಹತ್ತು ವರ್ಷಗಳ ಹಿಂದೆ; ನಗರದ ನೌಕರಿ ಬೇಡ, ಕಾಡು ಸುತ್ತುತ್ತ ಕಾಡಿನೂರಿನಲ್ಲೇ ಬದುಕಬೇಕು ಎಂದು ತಿರುಗಿ ಊರಿಗೆ ಬಂದಾಗಿನಿಂದ ಈ ಕಾಡಿನಲ್ಲಿ ಸುತ್ತಾಡುತ್ತಿದ್ದೇನೆ. ಕಾಡಿನಲ್ಲಿ ಹುಲಿ ಇದೆ ಎನ್ನುವ ಸಾಕ್ಷಿಯಾಗಿ ಆಗಾಗ "ಹಿಕ್ಕೆಗಳು" ಸಿಕ್ಕಿದ್ದವು. ಎಷ್ಟೋ ಬಾರಿ ಇಡೀ ದಿನ ಅಲೆದರೂ ಹುಲಿ ಏಕೆ, ಯಾವ ಕಾಡು ಪ್ರಾಣಿಯ ಕುರುಹೂ ಸಿಗದೇ ಇದ್ದದ್ದೂ ಇದೆ. ಎಲ್ಲೊ ಬೆರಳೆಣಿಕೆಯಷ್ಟು ಬಾರಿ ಮಾತ್ರ ಹೆಜ್ಜೆ ಸಿಕ್ಕಿದ್ದು. ಅದಕ್ಕೆ ಈ ಖುಷಿ.

ದಾಂಡೇಲಿ ಮೊದಲಿನಿಂದಲೂ ಹುಲಿ ಇದ್ದ ಪ್ರದೇಶವೇ! ಬ್ರಿಟಿಷ್ ದಾಖಲೆ ಪ್ರಕಾರ ೧೮೫೬ರಿಂದ ೧೮೬೬ರವರೆಗೆ ೧೫೮ ಹುಲಿಗಳನ್ನೂ, ೧೮೬೭ರಿಂದ ೧೮೭೭ರವೆಗೆ ೩೫೨ ಹುಲಿಗಳನ್ನು, ೧೯೭೮ರಿಂದ ೧೮೮೨ರವರೆಗೆ ೧೩೦ ಹುಲಿಗಳನ್ನ, ಅಂದಿನ ಬ್ರಿಟಿಶ್ ಸರಕಾರ ಅಧಿಕೃತವಾಗಿ ಈ ಭಾಗದಲ್ಲಿ ಕೊಲ್ಲಿಸಿದೆ. ಅಂದರೆ ೨೭ ವರ್ಷದಲ್ಲಿ ೬೪೦ ಹುಲಿಗಳನ್ನು ಕೊಲ್ಲಿಸಲಾಗಿದೆ. ಅದೂ ಬಹುಮಾನ, ಹಣ ಕೊಟ್ಟು.

ಈಗ ಇಡೀ ದೇಶದ ಕಾಡಿನಲ್ಲಿರುವ ಹುಲಿಗಳ ಸಂಖ್ಯೆ ೧೪೧೧!. ಕರ್ನಾಟಕದಲ್ಲಿ ೨೯೦!

ಬರೀ ಒಂದು ಶತಾಮಾನದಲ್ಲಿ ಎಷ್ಟೆಲ್ಲ ವರ್ಷಗಳಿಂದ ಬದುಕಿದ್ದ ವನ್ಯ ಜೀವಿಗಳೇಕೆ ವಿನಾಶದಂಚಿಗೆ ಸರಿದವು?

ಕಾಳಿ ಕಣಿವೆ ಅರಣ್ಯಾವಲಂಬಿ ಯೋಜನೆಗಳಿಗೆಲ್ಲ ಪ್ರಯೋಗ ಶಾಲೆ. ಕಳೆದ ಒಂದು ಶತಮಾನದಲ್ಲಿ ಈ ಕಣಿವೆಯಲ್ಲಿ ನಿಸರ್ಗದ ಮೇಲೆ ಪ್ರಯೋಗಗಳು ನಿರಂತರವಾಗಿ ನಡೆದಿದ್ದರ ಫಲ ಇದು.

ಮೊದಲು ಬ್ರಿಟೀಶರ ಕಣ್ಣೀಗೆ ಬಿದ್ದದ್ದು ಬಿದ್ದದ್ದು ಹೇರಳಾವಾಗಿ ಇದ್ದ ಸಾಗವಾನಿ ಮರಗಳು. ಕಾಳಿ, ಕಾನೇರಿ ಕಣಿವೆಗಳಲ್ಲಿ ಮರ ಕಡಿದು, ಆ ಕಣಿವೆಯ ಇಳಿಜಾರಿನಲ್ಲೇ ಕೆಳಗೆ ಇಳಿಸಿ, ನದಿ ನೀರಿನಲ್ಲೇ ತೇಲಿಸಿ ಬಿಡುತ್ತಿದ್ದರಂತೆ. ಕಾಳಿ ನದಿಯಲ್ಲಿ ತೇಲುವ ಮರದ ದಿಮ್ಮಿಗಳನ್ನು ಕಾರವಾರದಲ್ಲಿ ಹಿಡಿದು ವಿದೇಶಗಳಿಗೆ (ಕ್ಷಮಿಸಿ, ತಮ್ಮ ದೇಶಗಳಿಗೆ) ಕಳುಹಿಸಲಾಗುತ್ತಂತೆ. ಹಳ್ಳೀಯ ಜನ ಈಗಲೂ ಸಾಗವಾನಿ "ಸಿಲೇಪಾರಿ"ಗೆ ಹೋಗುತ್ತಿತ್ತು ಎಂದು ನೆನಪಿಸಿಕೊಳ್ಳುತ್ತಾರೆ. ಆ "ಸಿಲೇಪಾರು" ಅಂದರೆ ರೇಲ್ವೇ ಸ್ಲೀಪರುಗಳು ಎಂದು ಬೇರೆ ಹೇಳಬೇಕಾಗಿಲ್ಲ ತಾನೆ!.

೧೯೧೯ರಲ್ಲಿ ಸಾ ಮಿಲ್ಲ್ ಒಂದು ಪ್ರಾರಂಭವಾಗುದರೊಂದಿಗೆ ದಾಂಡೆಲಿ ನಗರ ಪ್ರಾರಂಭವಾಯಿತು. ೧೯೪೪ರಲ್ಲಿ ಪ್ಲೈ ವುಡ್ ಕಂಪನಿ, ೧೯೫೫ರಲ್ಲಿ ಪೇಪರ್ ಮಿಲ್ಲ್, ಫ಼ೆರ್ರೊ ಅಲಾಯ್ಸ್ ಕಂಪನಿ, ೬೭ರಲ್ಲಿ ಚಿಪ್ ಬೊರ್‍ಡ್ ಕಂಪನಿ ಹೀಗೆ ಅರಣ್ಯಾಧಾರಿತ ಕೈಗಾರಿಕೆಗಳ ನಗರವಾಗಿ ದಾಂಡೇಲಿ ಬೆಳೆಯಿತು. ಈ ಕಂಪನಿಗಳಿಗೆ ಕಚ್ಛಾ ಮಾಲನ್ನು ಪೂರೈಸಲು ಗಣಿಗಾರಿಕೆಯೂ ಪ್ರಾರಂಬವಾಯಿತು. ೧೯೯೮ರ ಸುಮಾರಿಗೆ ಸುಮಾರು ೮೭ ಕಡೆಗಳಲ್ಲಿ ಅಧಿಕೃತವಾಗಿ ಗಣಿಗಾರಿಕೆಯನ್ನು ನಡೆಸಲಾಗುತ್ತಿತ್ತು. ಈ ಕೈಗಾರಿಕೆಗಳೀಗಾಗಿ ದೇಶದೆಲ್ಲೆಡೆಯಿಂದ ನೌಕರರು ಬಂದು, ದಾಂಡೇಲಿ ಒಂದು ಲಕ್ಷಕ್ಕೂ ಹೆಚ್ಚು ಜನ ಸಂಖ್ಯೆ ಇರುವ ನಗರವಾಯಿತು.

ನಂತರ ಪ್ರಾರಂಭವಾದದ್ದು ವಿದ್ಯುತ್ ಉತ್ಪಾದನೆ. ಕಾಳಿ ಕಣಿವೆ ಏಳು ಬೃಹತ್ ಆಣೆಕಟ್ಟುಗಳು. ಸಾಲದ್ದಕ್ಕೆ ಕೈಗಾ ಬೇರೆ.

ಇವೆಲ್ಲವುಗಳ ನಡುವೆ ಹೇಗೆ ಉಳಿದಾವು ವನ್ಯಜೀವಿಗಳು?

ನಿರಾಸೆಗೊಳ್ಳಬೇಕಾದ್ದಿಲ್ಲ. .......

ಕಾಲ ಬದಲಾಗಿದೆ. .........

ಬರೀ ಕಾಡನ್ನು ಕಡಿದು ಅಭಿವೃದ್ದಿ ಸಾಧ್ಯವಿಲ್ಲ ಎನ್ನಲು ಉದಾಹರಣೆಯಾಗಿ ದಾಂಡೇಲಿಯ ಅರಣ್ಯಾಧಾರಿತ ಎಲ್ಲ ಕೈಗಾರಿಕೆಗಳು ಮುಚ್ಚಿವೆ. ಇದ್ದ ಒಂದೇ ಪೇಪರ್ ಮಿಲ್ಲ್, ಕೃಷಿ ಆಧಾರಿತ ಮರಗಳನ್ನು ನೆಚ್ಚಿಕೊಂಡಿದೆ.

ದಾಂಡೇಲಿ ನಗರದ ಜನಸಂಖ್ಯೆ ೪೮ ಸಾವಿರಕ್ಕೆ ಇಳಿದಿದೆ!

ಕಾಡನ್ನು ಕಡಿದೇ ಬದುಕ ಬೇಕು ಎನ್ನುವ ಜನರ ಸಂಖ್ಯೆ ಕಡಿಮೆ ಆಗಿ, ಕಾಡು ಆಧಾರಿತ ಪ್ರವಾಸೋದ್ಯಮ ಬೆಳೆಯುತ್ತಿದೆ.

ಸರಕ್ಷಣೆಯ ಪ್ರಯತ್ನಕ್ಕೆ ಬೆಂಬಲ ಸಿಗುತ್ತಿದೆ. ಈ ಪ್ರದೇಶ ಹುಲಿ ಸಂರಕ್ಷಿತ ಪ್ರದೇಶ ಎಂದು ಅಧಿಕೃತವಾಗಿ ಘೋಷಣೆಯಾಗಿದೆ. ಅಲ್ಲಲ್ಲಿ ವನ್ಯ ಜೀವಿಗಳ ಕುರುಹುಗಳು ಹೆಚ್ಚೆಚ್ಚು ಸಿಗತೊಡಗಿದೆ.

ಹುಲಿಗಳು ಇನ್ನೂ ನಮ್ಮ ಕಾಡಿನಲ್ಲಿ ಓಡಾಡಿಕೊಂಡಿವೆ ಎನ್ನುವ ಖುಷಿ ಎಂದೂ ಇರುತ್ತದೆ ಎನ್ನುವ ಭರವಸೆ ಮೂಡಿದೆ!.

.........ಉಳೀಸಬೇಕಾದ ಪ್ರಯತ್ನದ ಜವಾಬ್ದಾರಿಯೂ ಹೆಚ್ಚಿದೆ.

2009-03-16T13:13:00.001+05:30

ಕರ್ವಾಲೋ ಕಾದಂಬರಿಯ ಹೀರೋ ಮೊನ್ನೆ ಭೇಟಿಯಾದಾಗ!

ಮೊನ್ನೆ ಕಂಡ ಆನೆ

2009-03-16T12:26:00.000+05:30

ಇಂಥ ದೊಡ್ಡ ದಂತದ ಆನೆ ದಾಂಡೇಲಿಯಂತೂ ಅಪರೂಪವಾಗುತ್ತಿದೆ. ಮೊನ್ನೆ ಸಿಕ್ಕ ಅಪರೂಪದ ದರ್ಶನ.

2009-03-15T22:27:00.001+05:30

ಕಾಡು ಸಂಪಿಗೆ ಹಣ್ಣು. ಚಿತ್ರ: ಬಾಲಚಂದ್ರ ಸಾಯಿಮನೆ

ಶರಾವತಿ ಕಣಿವೆಗೆ ಆನೆಗಳ ವಿದಾಯ

2009-03-15T21:28:00.003+05:30

ಮೊನ್ನೆ ಪತ್ರಿಕೆಯಲ್ಲಿ ಓದಿದ ಸುದ್ದಿ ಮತ್ತೆ ಮತ್ತೆ ಕಾಡುತ್ತಿದೆ. ಶರಾವತಿ ಕಣಿವೆಯಲ್ಲಿ ಬದುಕುತ್ತಿದ್ದ ಆನೆ ಸತ್ತು ಹೋಗಿದೆಯಂತೆ. ಆ ಮೂಲಕ ಮುಂದಿನ ತಲೆಮಾರಿನ ಪಾಲಿಗೆ ಶರಾವತಿ ಕಣಿವೆಯಲ್ಲಿ ಆನೆಗಳಿಲ್ಲದ ಕಾಡು. ಸಾವಿರಾರು ವರುಶಗಳಿಂದ ಬಾಳಿಕೊಂಡಿದ್ದ ಜೀವಿಯೊಂದು ಅಲ್ಲಿ ಬಾಳಲಾರದೆ ಕೊನೆಯುಸಿರೆಳೆದಿದೆ.
ಜಲ ವಿದ್ಯುತ ಯೋಜನೆಗಳು, ಆ ಕಣಿವೆಯ ಕಾಡನ್ನು ನುಂಗಿದ ಮೇಲೆ ಅಳಿದುಳಿದ ಪಕ್ಕದ ಕಾಡಿನಲ್ಲಿ
ಬಾಳಿಕೊಂಡಿದ್ದ ಆನೆ ಮೊನ್ನೆ ಮಹಿಮೆಯ ಸಮೀಪದ ಕಾಡಿನಲ್ಲಿ ಸತ್ತು ಬಿದ್ದದ್ದು ಕಂಡುಬಂದಿದೆ.
ಮೈಸೂರು ಪ್ರಾಂತದಿಂದ ಈ ಭಾಗಕ್ಕೆ ವಲಸೆ ಬರುತ್ತಿದ್ದವು ಎಂದು ಶತಮಾನಗಳ ಹಿಂದಿನ ಧಾಖಲೆ ಹೇಳುತ್ತದೆ. ಹಾಗೆ ಬಂದವಕ್ಕೆ ಹಿಂದೆ ಹೋಗಲಾರದಂತೆ ಮಧ್ಯದ ಕಾಡು ನಾಶವಾಗಿ ಇಲ್ಲೇ ಉಳಿಯಬೇಕಾಯಿತು. ನಂತರದ ಅಭಿವೃದ್ದಿ ಯೋಜನೆಗಳು ಈ ಪ್ರದೇಶವನ್ನೂ ಛಿಧ್ರಗೊಳಿಸಿದವು.

ಉತ್ತರ ಕನ್ನಡದಲ್ಲಿ ಈಗ ಆನೆಗಳಿರುವುದು ದಾಂಡೇಲಿಯ ಸುತ್ತ ಮುತ್ತ ಮಾತ್ರ. ಸಂಖ್ಯೆ ಕೇವಲ ಅರ್ಧ ಶತಕದ ಆಜೂ ಬಾಜು. ಅವೂ ಅಲ್ಲಿ ಬಾಳಲಾರದೇ ಅರ್ಧ ಮಹಾರಾಷ್ಟ್ರಕ್ಕೆ, ಉಳಿದರ್ಧ ಯಲ್ಲಾಪುರ, ಮುಂಡಗೋಡದ ಮಾರ್ಗದಲ್ಲಿ ಹಾವೇರಿ ಜಿಲ್ಲೆ ಹೋಗುತ್ತಿವೆ. ಸರಕಾರಿ ದಾಖಲೆಗಳಲ್ಲಿ ಶೇ ೮೦ ಪ್ರತಿಶತ ಕಾಡು ಇರುವ ಉತ್ತರ ಕನ್ನಡ ಜಿಲ್ಲೆ ಇಷ್ಟು ಆನೆಗಳೂ ಭಾರವಾದವೇ.

ನಿಸರ್ಗ ಮತ್ತು ಮನುಷ್ಯನ ಹೋರಾಟದಲ್ಲಿ ನಿಸರ್ಗ ಈ ಕ್ಷಣಕ್ಕೆ ಸೋತಂತೆ ಅನ್ನಿಸಿದರೂ, ಸೋತವರು ನಾವೇ ಎಂದು ತಿಳಿಯಲು ಕಾಲ ಬೇಕು.

ನಾನೂ ಬ್ಲಾಗ್ ಬರೆಯಲು ಶುರು ಮಾಡಿದೆ !

2009-03-06T21:08:00.001+05:30

ಕೃಷಿ ಉದ್ಯೋಗ. ಕಾಡು ಹವ್ಯಾಸ. ವಾಸ ಮಲೆನಾಡಿನ ಮೂಲೆಯ ಒಂದು ಹಳ್ಳಿ. ಇದೊಂದು ಹೊಸ ಪ್ರಯೋಗ.
ಬ್ಲಾಗ್ ಬರೆಯಲು ಶುರು ಮಾಡುವಾಗ ಶಾಲೆಗೆ ಹೋಗುವ ನೆನಪಾಗುತ್ತಿದೆ . ಕಾಡು ಸಂಪಿಗೆ ಹಣ್ಣು, ಮುಳ್ಳು ಹಣ್ಣು ನಡುವೆ ಅ ಆ ಬರೆದ ಹಾಗೆ.